07:04, 07 - ءساۋىر 2022 | GMT +5
توقايەۆ ابۋ- ءدابيدىڭ تاق مۇراگەرى شەيح مۇحاممەد بەن زايد ءال ناحاياندى قازاقستانعا شاقىردى
نۇر- سۇلتان. قازاقپارات - قاسىم- جومارت توقايەۆ ابۋ- ءدابيدىڭ تاق مۇراگەرى شەيح مۇحاممەد بەن زايد ءال ناحايانمەن تەلەفون ارقىلى سويلەستى، دەپ حابارلايدى اقوردا.
قازاقستان پرەزيدەنتى مەن ابۋ- ءدابيدىڭ تاق مۇراگەرى ءبىرىن- ءبىرى قاسيەتتى رامازان ايىنىڭ باستالۋىمەن قۇتتىقتادى. قاسىم- جومارت توقايەۆ مۇحاممەد بەن زايد ءال ناحاياندى دۋبايدا وتكەن ەكسپو-2020 دۇنيەجۇزىلىك كورمەسىنىڭ ءساتتى وتۋىمەن قۇتتىقتادى.
اڭگىمەلەسۋ بارىسىندا ەكىجاقتى ساۋدا- ەكونوميكالىق جانە ينۆەستيتسيالىق ىنتىماقتاستىقتىڭ دامۋ پەرسپەكتيۆالارىنا ەرەكشە نازار اۋدارىلدى. تاراپتار ساياسي ديالوگ پەن ەكونوميكالىق بايلانىستاردى ودان ءارى كەڭەيتۋگە نيەتتى ەكەنىن ناقتىلادى. اتاپ ايتقاندا، بىرلەسكەن ينۆەستيتسيالىق جوبالاردى جۇزەگە اسىرۋعا مۇددەلىلىك تانىتاتىنى جونىندە ايتىلدى. اڭگىمە سوڭىندا قازاقستان پرەزيدەنتى ابۋ- ءدابيدىڭ تاق مۇراگەرىن بيىل ەلىمىزگە رەسمي ساپارمەن كەلۋگە شاقىردى.
