ۇزاق ءومىر ءسۇرۋ ءۇشىن قالاي تاماقتانعان ءجون؟

نۇر-سۇلتان. قازاقپارات - ادامنىڭ ءومىر جاسى ىشكەن اسى مەن ءومىر ءسۇرۋ ادەبىنە بايلانىستى ەكەنى انىق.

اسىرەسە، ىشكەن اسىنا كوپ تاۋەلدى. ادام اعزاسى كولىك قوزعالتقىشى سىندى: ۋاقتىلى كۇتىپ- باپتاساڭ، ساپالى «مايدى» دۇرىس قۇيىپ جۇرسەڭ، ۇزاق جۇرەدى. ال قاراماساڭ، ەرتە بۇزىلادى.

ەندەشە ەرتە «بۇزىلماس» ءۇشىن دۇرىس «مايدى» قالاي تاڭدايمىز، سونى قاراستىرىپ كورەيىك. نەمىس دارىگەرى، دەرماتولوگ ياەل ادلەر (Yael Adle) ۇزاق ءومىر ءسۇرۋدىڭ، ەرتە قارتايۋدىڭ الدىن الۋدىڭ جولى رەتىندە مىناداي تاماقتاۋ راتسيونىن ۇسىنادى.

ەڭ الدىمەن، دارىگەردىڭ ايتۋىنشا، ۇزاق ءومىر ءسۇرۋدىڭ نە ەكەنىن ءتۇسىنۋ ءۇشىن «جاستىق شاق» دەگەننىڭ نە ەكەنىن ءبىلۋىمىز كەرەك. جاستىق شاق دەگەنىمىز - ادام اعزاسىنىڭ قابىنۋعا بوي بەرمەيتىن قۋاتتىلىعى. جاس اعزا اۋرۋعا، قابىنۋعا قۋاتتى توتەپ بەرەدى. ەندەشە اعزانىڭ «جاستىق شاعىن» ۇزاعىنان ساقتاساق، سوعۇرلىم اۋرۋ مەن قابىنۋعا ۇشىرامايمىز.

ادام اعزاسى قابىنسا، تەرى مەن دەنەسى تەز قارتايادى، ديابەت، قاتەرلى ىسىك، جۇرەك-قان اۋرۋلارى سىندى دەرتكە جول اشادى.

«ال اعزانى جاس ءارى ساۋ ۇستاۋ ءۇشىن دۇرىس تاماقتانۋىمىز كەرەك. اسىرەسە، ومەگا-3 پەن ومەگا-6 ماي قىشقىلىنىڭ اعزاداعى نورماسى تۇراقتى، تەپە-تەڭ بولۋى ءتيىس. بۇل ەكى ماي قىشقىلىنىڭ كولەمى تەپە-تەڭ بولسا، اعزانىڭ قابىنۋعا قارسى تۇرارلىق كۇشى كوبەيەدى. جاس شاق سودان ۇزارادى»، - دەيدى ياەل ادلەر.

مەديكتىڭ ايتۋىنشا، ومەگا-3 قىشقىلى تەڭىزدىڭ مايلى بالىقتارىندا كوپ بولادى. ال ومەگا-6 بولسا، ەت مەن شۇجىق سىندى جانۋارتەكتەس تاعامداردا كوپ. ومەگا-3 قىشقىلىنا سارىمساق (چەسنوك)، كۋركۋما سىندى سپەتسيالاردى قوسىپ جەسە، اعزانىڭ قابىنۋعا قارسى تۇرارلىق كۇشى تاعى كوبەيەدى. جەمىس-جيدەك، بروككولي سىندى انتيوكسيدانتقا (قابىنۋدىڭ الدىن الاتىن) باي نارسەلەردى دە ءجيى جەپ جۇرگەن ءجون.

«سونداي-اق، جاسۇنىققا باي تاعامداردى ءجيى كوپ تۇتىنعان ابزال. جاسۇنىق ىشەكتەگى پايدالى باكتەريالاردى كوبەيتەدى، ىشەك ميكروبيوماسىن جاقسارتادى. ىشەك فلوراسىن جاقسارتۋعا ايران، تابيعي يوگۋرت، اشىتىلعان قىرىققابات سىندى تاعامدار دا كومەكتەسەدى»، - دەيى دارىگەر.

جوعارىدا قابىنۋعا قارسى تۇرارلىق تاعامدار جايلى ايتىلدى. ەندى قابىنۋدى كۇشەيتەتىن تاعامدار بارىن ۇمىتپايىق.

«قارتايۋدىڭ الدىن الۋ ءۇشىن قابىنۋدى كۇشەيتەتىن تاعامداردى جەمەڭىز. ولارعا قانت، اق ۇن، سيىردىڭ ءسۇتى جاتادى. ءسۇتتىڭ ءوزىن ەمەس، ونىڭ ورنىنا ىرىمشىك، يوگۋرت، ايران، سۇزبە سىندى قىشقىل ونىمدەرىن تۇتىنعان دۇرىسىراق. وندا امينقىشقىلدار مول بولادى»، - دەپ تۇسىندىرەدى ياەل ادلەر.

P. S. كولىكتىڭ قوزعالتقىشى زاۋىتتان بەلگىلى ءبىر شەكپەن شىعادى. ياعني، بىرەۋى 1 ميلليون شاقىرىمعا دەيىن جۇرە السا، ەندى 700-800 شاقىرىمعا عانا جەتەتىندەي ەتىپ شىعارىلادى. كەيبىرى ءتىپتى 2 ميلليون شاقىرىمعا دەيىن شىداۋى مۇمكىن. ەگەر موتورعا دۇرىس قاراساڭىز، وندا وسى بەلگىلەنگەن شاقىرىمدى وپ-وڭاي ءجۇرىپ شىعادى. ءتىپتى، ودان دا كوپ ءجۇرۋى مۇمكىن. ال دۇرىس قاراماساڭىز، وندا 300-400 شاقىرىمدا-اق «تارسىل» پايدا بولىپ، جاعدايى ناشارلاۋى مۇمكىن. ادامنىڭ دا دەنساۋلىعى ءدال سونداي.

massaget.kz