اقتوتى رايىمقۇلوۆا «قازاق كونسەرتكە» باسشى بولدى

None
None
نۇر-سۇلتان. قازاقپارات - اقتوتى رايىمقۇلوۆا «قازاق كونسەرت» مەملەكەتتىك كونسەرتتىك ۇيىمىنىڭ ديرەكتورى قىزمەتىنە تاعايىندالدى، دەپ حابارلايدى ۇيىمنىڭ باسپا ءسوز قىزمەتىنە سىلتەمە جاساپ.

جاڭادان تاعايىندالعان باسشىنى ۇجىمعا مادەنيەت جانە سپورت ءمينيسترى داۋرەن ابايەۆ تانىستىردى.

اقتوتى رايىمقۇلوۆا - قازاقستاننىڭ ەڭبەك سىڭىرگەن قايراتكەرى، ونەرتانۋ عىلىمدارىنىڭ دوكتورى.

1987-جىلى قۇرمانعازى اتىنداعى الماتى مەملەكەتتىك كونسەرۆاتورياسىن «كومپوزيتسيا» جانە «فورتەپيانو» ماماندىعى بويىنشا اياقتادى.

حالىقارالىق بيزنەس اكادەمياسىندا ءبىلىم الىپ، DBA (Doctor of Business Administration) دارەجەسىن العان. ءتۇرلى جىلدارى قۇرمانعازى اتىنداعى الماتى مەملەكەتتىك كونسەرۆاتورياسىندا وقىتۋشى، كافەدرا مەڭگەرۋشىسى، پرورەكتور بولىپ ەڭبەك ەتتى.

2014-2016-جىلدار ارالىعىندا مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى بولىپ جۇمىس ىستەدى.

2016-جىلى مادەنيەت جانە سپورت ۆيتسە-ءمينيسترى، 2019-2022 ج ج. ارالىعىندا ق ر مادەنيەت جانە سپورت ءمينيسترى قىزمەتتەرىن اتقاردى.

بۇعان قوسا، اقتوتى رايىمقۇلوۆا عىلىمي ەڭبەكتەردىڭ اۆتورى، كوپتەگەن مۋزىكالىق شىعارمالاردىڭ، كوركەم فيلمدەرگە ارنالعان ساۋندترەكتەردىڭ كومپوزيتورى بولىپ تابىلادى.

ەسكە سالساق، قازاق كونسەرت - ەلىمىزدەگى ەڭ ءىرى كونسەرتتىك ۇيىمداردىڭ ءبىرى. 60 جىلدىق تاريحى بار بۇل ۇيىم 2016-جىلدان بەرى قازاق كونسەرت ءوز جۇمىسىن ەلوردادا جالعاستىرىپ كەلەدى.

ۇيىم «قازاقستان» ورتالىق كونسەرت زالىندا ورنالاسقان. كونسەرتتىك مەكەمەنىڭ الماتى قالاسىندا فيليالى بار. 2021-جىلى ۇيىمعا ك س ر و جانە قازاقستاننىڭ حالىق ءارتىسى، حالىق قاھارمانى روزا باعلانوۆانىڭ ەسىمى بەرىلدى.

«قازاق كونسەرت» ۇيىمىندا ەلىمىزدىڭ ۇزدىك ارتىستەرى مەن شىعارماشىلىق ۇجىمدارى باس قوسقان. قازاق كونسەرتتە بارلىق مۋزىكالىق ونەردىڭ جانرلارى ۇسىنىلعان: فولكلور، كلاسسيكا، ەسترادا، ميۋزيكل تەاترى. شىعارماشىلىق قۇرامعا «استانا سازى» قازاق مەملەكەتتىك فولكلورلىق ءانسامبلى، «فورتە تريو» مەملەكەتتىك تريوسى، قازاق مەملەكەتتىك سيمفونيالىق وركەسترى، «Astana Musical» مەملەكەتتىك تەاترى، «كلاسسيكالىق ونەر» ءبولىمى، «حالىق قازىناسى» ونەر ۇجىمى، «Sazsoul» ۆوكالدىق-اسپاپتىق ءانسامبلى، ەلىمىزگە جانە الەمگە تانىمال ەسترادالىق انشىلەر مەن توپتار كىرەدى.

قازاق كونسەرت رەسپۋبليكالىق جانە حالىقارالىق جوبالاردى جۇزەگە اسىرىپ، بەلسەندى گاسترولدىك قىزمەت جۇرگىزۋدە.

سوڭعى جاڭالىقتار