شىعىس قازاقستان مەن اباي وبلىستارىنىڭ قالاي بولىنەتىنى بەلگىلى بولدى
شىعىس قازاقستان وبلىسىنىڭ اكىمشىلىك- اۋماقتىق قۇرىلىمىن وزگەرتۋ بارىسىندا تارباعاتاي اۋدانىنىڭ قۇرامىنان اقسۋات جانە تارباعاتاي اۋداندارىن، ال كوكپەكتى اۋدانىنان سامار جانە كوكپەكتى اۋداندارىن قۇرۋ تۋرالى شەشىم قابىلدانىپ وتىر. الداعى ۋاقىتتا تارباعاتايدىڭ اكىمشىلىك ورتالىعى - اقجار اۋىلى، اقسۋات اۋدانىنىڭ ورتالىعى - اقسۋات اۋىلى بولماق.
تەرريتوريالىق بولىنىستەرگە سايكەس، شىعىس قازاقستان وبلىسىنىڭ اۋماعى 97,8 مىڭ شارشى مەتر بولادى. قۇرامىنا 9 اۋدان جانە 2 قالا كىرەدى. اباي وبلىسىنىڭ اۋماعى 185,5 مىڭ شارشى مەتردى قۇراپ، قۇرامىنا 8 اۋدان جانە 2 قالا ەنەدى.
«اتاپ ايتقاندا، ش ق و اۋماعىندا - وسكەمەن، ريددەر قالالارى، گلۋبوكوە، زايسان، كاتونقاراعاي، كۇرشىم، سامار، تارباعاتاي، ۇلان، شەمونايحا، التاي اۋداندارى قالادى. اباي وبلىسىنا - سەمەي، كۋرچاتوۆ قالالارى، اباي، اياگوز، اقسۋات، بەسقاراعاي، بورودۋليحا، جارما، كوكپەكتى، ءۇرجار اۋداندارى قارايدى. جاڭادان قۇرىلاتىن وبلىس حالقىنىڭ سانى - 638,3 مىڭ ادامدى قۇراسا، شىعىس قازاقستان وبلىسىنىڭ حالقى - 717,6 مىڭ بولماق. بۇل ايماق تۇرعىندارىنىڭ 53 پايىزى»، - دەپ حابارلادى ش ق و اقپارات ورتالىعى.
ونەركاسىپتەردىڭ 32 پايىزى - اباي وبلىسىندا، 68 پايىزى - ش ق و- دا قالماق. ەكى وبلىستىڭ قالا- اۋداندارى 1997 -جىلى سەمەي وبلىسى قوسىلعانعا دەيىنگى تەرريتوريالار بويىنشا بولىنگەن. سەسسيانىڭ قورىتىندىسىندا بىرلەسكەن قاۋلى مەن شەشىم ۇكىمەتكە جولداندى.
اۆتور: تالعاتجان مۇحامەتبەك ۇلى
