ق ر پرەزيدەنتىنىڭ اتىنا رامازان ايىنىڭ باستالۋىنا وراي قۇتتىقتاۋ حاتتار كەلىپ تۇسۋدە
وزبەكستان پرەزيدەنتى شاۆكات ميرزيەۆ ءوزىنىڭ قۇتتىقتاۋىندا ەكى ەل حالقىن بايلانىستىراتىن بەرىك دوستىق پەن تاتۋ كورشىلىك، ستراتەگيالىق سەرىكتەستىك پەن وداقتاستىق قاتىناستاردىڭ سوڭعى جىلدارى قارقىندى دامىپ كەلە جاتقانىن اتاپ وتكەن.
- وزبەكستان مەن قازاقستان اراسىنداعى ىنتىماقتاستىقتىڭ جان- جاقتى كەڭەيۋى كورشىلەس ەكى حالىق پەن مەملەكەتتىڭ وركەندەۋىنە عانا ەمەس، سونداي- اق بۇكىل ايماعىمىزداعى بەيبىتشىلىكتى، تىنىشتىق پەن تۇراقتىلىقتى قامتاماسىز ەتۋگە ىقپال ەتەدى، - دەلىنگەن وزبەك كوشباسشىسىنىڭ جەدەلحاتىندا.
ساۋد ارابيا كورولى سالمان بەن ابدەلازيز ءال ساۋد جانە كورولدىكتىڭ تاق مۇراگەرى مۇحاممەد بەن سالمان بەن ابدەلازيز ءال ساۋد قاسىم- جومارت توقايەۆتى قاسيەتتى رامازان ايىمەن قۇتتىقتاپ، وعان زور دەنساۋلىق، باقىت تىلەگەن، ال باۋىرلاس قازاقستان حالقىنىڭ ءوسىپ- وركەندەي بەرۋىنە نيەتتەستىك بىلدىرگەن.
سونىمەن قاتار قازاقستان كوشباسشىسىن ب ا ءا پرەزيدەنتى حاليفا بەن زايد ءال ناحايان، ب ا ءا ۆيتسە- پرەزيدەنتى، پرەمەر- ءمينيسترى، دۋباي امىرلىگىنىڭ بيلەۋشىسى مۇحاممەد بەن راشيد ءال ماكتۋم، ب ا ءا قارۋلى كۇشتەرىنىڭ جوعارعى باس قولباسشىسىنىڭ ورىنباسارى مۇحاممەد بەن زايد ءال ناحايان، يوردانيا كورولى II ابداللا، كۋۆەيتتىڭ تاق مۇراگەرى مەشال ءال- احمەد ءال- دجابەر اس- ساباح، ماروككو كورولى VI مۇحاممەد، باحرەين كورولى حاماد بەن يسا ءال حاليفا، پالەستينا پرەزيدەنتى ماحمۋد ابباس قۇتتىقتادى.
