قازاقستاندىق تاەكۆوندوشى الەمدىك رەيتينگىدە كوش باستادى

نۇر- سۇلتان. قازاقپارات - قازاقستاندىق تاەكۆوندوشى جانسەل دەنيز جاڭارتىلعان الەمدىك رەيتينگىدە كوش باسىنا كوتەرىلدى، دەپ حابارلايدى قازاقپارات ءتىلشىسى.

بۇل قازاقستان تاەكۆوندوسى تاريحىندا تۇڭعىش رەت بولىپ وتىر. ايەلدەر اراسىندا 73 كەلىگە دەيىنگى سالماقتا دەنيز 139.81 بالمەن ءبىرىنشى ورىندا كەلەدى. رەسەيلىك پولينا حان (107.94) ەكىنشى، وڭتۇستىككورەيالىق دا بين لي (105.60) ءۇشىنشى ساتىدا. جانسەل بۇرىنعى نۇسقادا ءتورتىنشى ورىندا ەدى. ءوز سپورتتىق جولىندا دەنيز 2017 -جىلى تايبەيدە جازعى ۋنيۆەرسيادادا جانە 2018 -جىلى دجاكارتادا (يندونەزيا) وتكەن ازيا ويىندارىندا كۇمىس مەدالعا قول جەتكىزدى. سونداي- اق ول - ءتۇرلى حالىقارالىق تۋرنيرلەردىڭ چەمپيونى ءھام جۇلدەگەرى.

«مەنىڭ ارمانىم الىستا بولىپ كورىنگەنىمەن، ول ورىندالدى. مەن بۇگىن شىققان جاڭارتىلعان الەمدىك رەيتينگىدە ءبىرىنشى ورىنعا يە بولدىم. بۇل قازاقستان تاەكۆوندوسى تاريحىندا العاش رەت بولىپ وتىر. مەن جالعىز جاناشىرىم - اناما العىس ايتقىم كەلەدى. وكىنىشكە قاراي، جولىمدا جەڭىلىستەر، ساتقىندىق، الداۋ دا از بولعان جوق. ءبىراق، ءالحامدۋليللاھ، مەن وسىندامىن. قۋانىشىمدى بولىسكەندەردىڭ بارىنە راحمەت. سونداي- اق بارلىق مۇسىلمان قاۋىمىن قاسيەتتى رامازان ايىنىڭ باستالۋىمەن قۇتتىقتايمىن. دۇعا- تىلەكتەرىڭىز قابىل بولسىن! P. S. مىنا سۋرەتكە 10 جىل بۇرىن ءتۇسىپ ەدىم. ماعان ءوز ارمانىمدى جازۋدى وتىنگەن. مەن الەمدە №1 بولعىم كەلەدى دەپ جازدىم»، دەپ جازدى جانسەل دەنيز Instagram-داعى پاراقشاسىندا.