جايىقتا قايتادان بالىق قىرىلۋى مۇمكىن
بالىقشىلار 2 كۇن بويى سۋ بەتىندە قالقىپ تۇرعان مايعا ۇقساس سۇيىقتىقتى بايقاعان. شۇعىل الىنعان سىنامالار ناتيجەسىندە سۋ قۇرامىنان 2 ەسە كوپ حلور انىقتالىپتى. ابىروي بولعاندا ەشبىر بالىق زيان كورمەگەن. ءبىراق بۇل جاعداي ەندى قايتالانسا، زاۋىتتاعىلار وراسان زور شىعىنعا باتامىز با، - دەپ قورقىپ وتىر.
جانبولات ابىلايەۆ، بەكىرە زاۋىتى ديرەكتورىنىڭ ورىنباسارى:
- قىرىلىپ قالۋ قاۋپى بار. ونى جاسىراتىن ەشتەڭەسى جوق. ءبىز ءوزىمىز تاپسىرعان كەزدە حلوردىڭ كولەمى 2 ەسە كوپ. نەگىزى 350 بولسا، بىزدە 780-850 كورسەتىپ تۇر. ول كەزدە بالىقتار زيموۆكادا بولدى. تەرەڭدە جاتتى. وندا تەك بەتىنەن ءوتىپ كەتتى. قازىر زيموۆكادان كوتەردىك. بالىق سۋدىڭ بەتىندە جۇرەدى.
شاعىم تۇسكەننەن كەيىن جاۋاپتىلار تەكسەرۋ جۇمىستارىنا كىرىسكەن. ءبىراق زياندى سۇيىقتىقتىڭ قايدان كەلگەنى ءالى بەلگىسىز. بالىق شارۋاشىلىعى ينسپەكتسياسىنىڭ مالىمەتىنشە، تەكسەرۋ جۇمىستارى ءالى ءجۇرىپ جاتىر.
نۇرلىبەك گايسين، «جايىق- كاسپي» وبلىسارالىق باسسەيندىك بالىق شارۋاشىلىعى ينسپەكتسياسىنىڭ باسشىسى:
- اتىراۋ بالىق ينسپەكتسياسى ءبولىمى مەن دامبى بالىق ينسپەكتسياسى ءبولىمىنىڭ قىزمەتكەرلەرى انىقتاپ تەكسەردى. الايدا ول جەردەگى ەشبىر كەمەدەن، نە بولماسا ەشبىر سۋ استىنان شىعىپ جاتقان ماي انىقتالمادى. 2-3 كۇن زەرتتەگەننەن كەيىن، اعىس جۇرگەن ۋاقىتتا ول جەردە مايدىڭ بەلگىلەرى جويىلىپ كەتتى. ءبىز وعان تولىقتاي قۇجاتتادى جيناپ، اتىراۋ وبلىستىق تابيعات قورعاۋ پروكۋراتۋراسىنا جولدادىق.
زاۋىتتا قازىر 14 توننا بەكىرە تۇقىمداس بالىق بار. بيىل ودان 350 كەلى ۋىلدىرىق الۋ جوسپارلانىپ وتىر. سوندىقتان جاۋاپتىلار باقىلاۋدى كۇشەيتپەسە سۋ مارجاندارى تاعى دا قىرىلىپ قالۋى مۇمكىن.
www.24.kz
