قاراعاندى مۇراجايىندا عارىش جايلى جادىگەرلەر بار

None
None
قاراعاندى. قازاقپارات - تۇڭعىش عارىشكەر يۋري گاگاريننىڭ ءسوزى جازىلعان پلاستينكانى، عارىشكەرلەردىڭ قولتاڭبالارى بار فوتوسۋرەتتەردى جانە قازاقستاننىڭ تۇڭعىش عارىشكەرى توقتار اۋباكىروۆتىڭ اسكەري فورماسىن قاراعاندى وبلىستىق تاريحي-ولكەتانۋ مۇراجايىنان كورۋگە بولادى، دەپ حابارلايدى قازاقپارات ءتىلشىسى.

7- ساۋىردەن باستاپ ايدىڭ سوڭىنا دەيىن «عارىش. عارىشكەرلەر. قاراعاندى -عارىش ايلاعى» كورمەسى وتەدى.

اتالعان مۇراجاي قورىندا عارىش سالاسىنىڭ دامۋىنا قاتىستى كوپتەگەن ماتەريالدار ساقتالعان. ولاردىڭ قاتارىندا عارىشكەرلەر مەن عارىش ەكيپاجدارىنىڭ جەرگە قونعانداعى فوتوسۋرەتتەرى، رەسەيلىك عارىشكەرلەر قاراعاندى مۇراجايىنا سىيعا بەرگەن فيلاتەليا، نۋميزماتيكا، فالەريستيكا توپتامالارى، ءتىپتى عارىشتىق ازىقتار ساقتالعان تيۋبيكتەر بار.

كوپتەگەن ەكسپوناتتار قورعا «مۇراجايعا سىيلىق» اكتسياسىنىڭ اياسىندا جينالعان. بۇل شاراعا 2019-جىلى «پلاستيكا جانە قوزعالىس» ستۋدياسىنىڭ تاربيەلەنۋشىلەرى بەلسەنە قاتىسقان. ولار مەرەيتويلىق مونەتالاردى، ماركالاردى، پوشتا كونۆەرتتەرى مەن عارىش تاقىرىبىنداعى بەلگىشەلەردى تاپسىردى.

«قاراعاندىلىقتاردىڭ اعا بۋىنى دا بۇل شارادان بەيجاي قالعان جوق. ءبىزدىڭ قالامىزدىڭ تۇرعىنى ۆيكتور لاۆەتسكي ۇزاق جىلدار بويى جەزقازعاندا جۇمىس ىستەپ، قاراعاندى وبلىسىنىڭ اۋماعىنا قونعان عارىشكەرلەرمەن بىرنەشە رەت كەزدەسكەن. ول ءبىزدىڭ مۇراجايعا عارىشكەرلەر مەن ولاردىڭ ۇشۋ كۇندەرى بەينەلەنگەن شاعىن پلاكاتتار، وسى تاقىرىپتاعى كىتاپتار، عارىش اپپاراتتارىنىڭ قونۋ ورنىنان فوتوماتەريالدار جانە عارىشكەرلەردىڭ قولتاڭبالارى بار كونۆەرتتەر سىيلادى. ونىڭ ىشىندە بىرەگەي جانە قۇندى ەكسپونات - يۋري گاگاريننىڭ ۇشۋعا دەيىن جانە ودان كەيىنگى ءسوزى بار يىلگىش پلاستينكاداعى جازبا»، - دەيدى قور ءبولىمىنىڭ اعا عىلىمي قىزمەتكەرى دينارا ساكىمباي.

سونىمەن قاتار، مۇراجايدا عارىشتىق وربيتادا بولعان قاراعاندى قالاسىنىڭ ەلتاڭباسى بار ماتا ساقتاۋلى. ونى عارىشقا «سويۋز ت م ا-12م» ەكيپاجى الىپ كەتكەن.

2014-جىلى باسقارىلاتىن كەمەنىڭ اپپاراتى جەزقازعان اۋدانىنا امان-ەسەن قوندى.

قاراعاندىنىڭ 80 جىلدىعىنا ارنالعان عارىشكەرلەردىڭ قولتاڭباسى بار ماتا مۇراجايعا سىيعا تارتىلدى.

«قونۋ الاڭى بەلگىسىز» تەاتر قويىلىمىنا ارنايى تىگىلگەن عارىشكەرلەردىڭ كوستيۋمدەرى دە بار. كورمەگە كەلۋشىلەر وزدەرىن قىزىقتىرعان «عارىشتىق» زاتتاردى قولىمەن ۇستاپ، ولارمەن ەستەلىك سۋرەتكە تۇسە الادى.

«ەكسپوناتتار شەرۋى» جوباسى وبلىستىق تاريحي-ولكەتانۋ مۇراجايىنىڭ 90 جىلدىعىنا ارنالعان. جىل بويى مۇندا اي سايىن مۇراجاي قويمالارىنان تاقىرىپتىق كورمەلەر وتەدى.

سوڭعى جاڭالىقتار