قازاقستان ستراتەگيالىق زەرتتەۋلەر ينستيتۋتى جاڭا تالقىلاۋ الاڭىن اشتى
ساراپتاما الاڭىنداعى العاشقى وتىرىستا «مەملەكەت باسشىسىنىڭ ساياسي رەفورمالارى» تاقىرىبى تالقىلاندى.
مودەراتور - ق ر پرەزيدەنتىنىڭ جانىنداعى ق س ز ي ديرەكتورى ەركىن تۇقىموۆ ءوز سوزىندە تالقىلاۋ الاڭىنىڭ جاڭا وي-پىكىرلەردى قالىپتاستىرۋعا جانە ەل دامۋى ماسەلەلەرى بويىنشا جاڭا يدەيالاردى ىزدەۋگە مۇمكىندىك بەرەتىنىن اتاپ ءوتتى.
«ءبىزدىڭ بۇگىنگى باسقوسۋىمىز وتە ماڭىزدى. ءبىز ۇلتتىق ساراپتاما الاڭىنىڭ العاشقى وتىرىسىن اشامىز. ونىڭ اتاۋىن قازىرگى زامان رۋحىندا، جاڭا قازاقستاننىڭ قۇرىلۋى كەزەڭىندە «ق س ز ي GPS» دەپ اتادىق. ياعني، بۇل قازاقستاننىڭ دامۋى ءۇشىن ۇنەمى جاڭا يدەيالاردى ىزدەستىرىپ جۇرەتىنىمىزدى بىلدىرەدى. ەكىنشى جاعىنان، قازاق تىلىندە GPS- ءتى «Gylym. Pikir. Sayasat» دەپ تۇسىندىردىك. قازىرگى ۋاقىتتا قوعام مەن بيلىكتىڭ ۇنەمى ساراپتامالىق ديالوگقا جانە پىكىر الماسۋعا مۇددەلى ەكەنى بايقالادى. ءبىز قانداي قازاقستاندى قۇرىپ جاتىرمىز، بارلىق قازاقستاندىق جاقسى ءومىر ءسۇرۋى ءۇشىن، قازاقستان الەمدىك قوعامداستىقتىڭ ودان دا تابىستى مۇشەسى بولۋى ءۇشىن نە ىستەۋىمىز كەرەك جانە نە ىستەپ جاتىرمىز؟ وسى ماسەلەلەردىڭ بارلىعى ازاماتتاردى قىزىقتىرىپ وتىر»، - دەدى ەركىن تۇقىموۆ ساراپتامالىق الاڭنىڭ اشىلۋىندا.
العاشقى جيىنعا ق ر پارلامەنتى سەناتىنىڭ دەپۋتاتى، كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەسى ءلاززات سۇلەيمەن، ق ر پارلامەنتى ءماجىلىسىنىڭ دەپۋتاتى، «اق جول» قازاقستان دەموكراتيالىق پارتياسىنىڭ ءتوراعاسى ازات پەرۋاشيەۆ، «AMANAT» پارتياسىنىڭ حاتشىسى داۋلەت كارىبەك، ق ر پارلامەنتى ءماجىلىسىنىڭ ءتوراعاسى ەرمۇحامەت ەرتىسبايەۆ جانە باسقالار قاتىستى.
