ەل اسكەرىنىڭ جاۋىنگەرلىك دايىندىعى پىسىقتالادى

None
None
نۇر- سۇلتان. قازاقپارات - ەلىمىزدە اسكەردىڭ جاۋىنگەرلىك دايىندىعى پىسىقتالادى. باقىلاپ تەكسەرۋ اياسىندا قۇرامالار مەن بولىمدەر تۇراقتى ورنالاسۋ پۋنكتتەرىنەن شىعىپ، جاۋىنگەرلىك تەحنيكامەن وقۋ- جاتتىعۋ پوليگوندارىنا مارش جاسايدى، دەپ حابارلايدى قازاقپارات ق ر قورعانىس مينيسترلىگىنە سىلتەمە جاساپ.

مەملەكەت باسشىسى قاسىم- جومارت توقايەۆتىڭ اسكەردىڭ جاۋىنگەرلىك دايىندىعىن تۇبەگەيلى نىعايتۋ جونىندەگى مىندەتتەرىن ىسكە اسىرۋ شەڭبەرىندە بۇل شارا بيىل جاڭا پىشىندە وتكىزىلىپ جاتىر. باس شتابتىڭ جوسپارىنا سايكەس، قۇرامالار مەن اسكەري بولىمدەر وقۋ دابىلىمەن كوتەرىلەدى. تۇراقتى ورنالاسۋ پۋنكتتەرىنەن شىعىپ، جاۋىنگەرلىك تەحنيكامەن وقۋ- جاۋىنگەرلىك تاپسىرمالاردى ورىنداۋ ءۇشىن وقۋ- جاتتىعۋ پوليگوندارىنا مارش جاسايدى.


اسكەري تەحنيكا اۆتوكولىك جولدارىمەن جانە ارنايى جابدىقتالعان لەكتەرمەن قوزعالادى. ءبىرقاتار اسكەري بولىمدەر تەمىرجول كولىگىمەن جىلجىمالى قۇرام پلاتفورمالارىن پايدالانا وتىرىپ، بەلگىلەنگەن جەرلەرگە جەتكىزىلەدى. پوليگونداردا تاكتيكالىق، ونىڭ ىشىندە تۇنگى جاعدايدا دا وقۋ- جاتتىعۋلار مەن اتىستار وتەدى.


اسكەرلەردى باقىلاۋدىڭ بۇل ءتۇرى اسكەري بولىمدەردىڭ جاۋىنگەرلىك دايارلىعىن، ولاردىڭ الىس قاشىقتىققا جەتۋ قابىلەتىن، تەحنيكا مەن قارۋ- جاراقتىڭ، جەكە قۇرامنىڭ دايىندىعىن، سونداي- اق كومانديرلەردىڭ ۇرىس كەزىندە بولىمشەلەردى باسقارۋ قابىلەتىن جان- جاقتى باعالاۋعا مۇمكىندىك بەرەدى. ق ر قارۋلى كۇشتەرىندەگى اسكەرلەردى باقىلاۋ تەكسەرىسى 4 - ساۋىردە باستالدى. ق ر قورعانىس مينيسترلىگى ۆەدومستۆونىڭ رەسۋرستارىندا جاريالاناتىن رەسمي اقپاراتتارعا عانا سەنۋدى سۇرايدى.

سوڭعى جاڭالىقتار