الەمدەگى گەوساياسي احۋال قازاقستانعا تاۋار اكەلۋگە كەدەرگى بولىپ جاتىر ما

نۇر- سۇلتان. قازاقپارات - ەلىمىزگە سىرتتان تاۋار اكەلۋگە نەمەسە كەرىسىنشە ەلدەن تاۋار شىعارۋعا قازىرگى گەوساياسي جاعداي اسەر ەتتى مە؟

بۇل ساۋالعا ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ جاۋاپ بەردى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا ءتىلشى «كورشى ەلدەردە بولىپ جاتقان احۋالعا بايلانىستى قازاقستانعا تاۋار اكەلۋدە نەمەسە ەكسپورتتاۋدا قيىندىق، كەدەرگىلەر بولىپ جاتقان جوق پا؟» دەگەن ساۋال جولدادى.

«ەلىمىزگە تاۋار جەتكىزۋ نەمەسە تاۋار جونەلتۋ بويىنشا ەشقانداي پروبلەما جوق. رەسەي فەدەراتسياسى تاۋارلاردى وتكىزىپ جاتىر. شەتەلدىك پورتتار دا قازاقستاندىق تاۋارلاردى پروبلەماسىز قابىلداپ جاتىر. ولاردىڭ باستى تالابى - تاۋار جانە ونى جەتكىزۋشى كومپانيا قازاقستاندىق بولۋى شارت. سونىمەن قاتار ترانسكاسپي حالىقارالىق كولىك مارشرۋتىنىڭ (ت م ت م) اياسىن كەڭەيتۋدى قاراستىرىپ جاتىرمىز. كاسپيدەگى ءبىزدىڭ اقتاۋ جانە قۇرىق پورتىنان 10 ميلليون ا ق ش دوللارىنىڭ تاۋارى تاسىمالدانادى»، - دەپ جاۋاپ بەردى قايىربەك وسكەنبايەۆ.

ءمينيستردىڭ ايتۋىنشا، تاۋار تاسىمالداۋدا ەشقانداي شەكتەۋ، كەدەرگى جوق. بۇعان دەيىن يندۋستريا جانە ينفراقۇرىلىمدىق دامۋ ءمينيسترى رەسپۋبليكالىق ماڭىزى بار جولداردى سۋ شايۋ ماسەلەسىنە قاتىستى تۇسىنىك بەرگەن ەدى. سونداي- اق، قايىربەك وسكەنبايەۆ وڭدەۋ ونەركاسىبى سالاسىندا جۇزەگە اسىرىلاتىن يندۋستريالىق جوبالاردىڭ پۋلى جاساقتالعانىن ايتتى. ودان بولەك، اتالعان ۆەدومستۆو باسشىسى ەلىمىزدەگى تۇرعىن ءۇي باعاسىنا قاتىستى ويىن ورتاعا سالدى.

اۆتور: ءالي يبرايەۆ