قازاقستاندا تەگىن ۇيىرمەلەردى قارجىلاندىرۋ كولەمى ارتادى

نۇر- سۇلتان. قازاقپارات - ق ر مادەنيەت جانە سپورت ءمينيسترى داۋرەن ابايەۆ تەگىن مادەني ۇيىرمەلەر بويىنشا تۋىنداعان پروبلەما تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«بۇل ماسەلە جۇمىس ىستەپ تۇر. تەك 2-3 وبلىستا عانا وتىنىمدەردىڭ كوپ كەلۋىنەن پروبلەما تۋىندادى. ۇيىرمەگە قاتىسقىسى كەلەتىندەردىڭ سانى جوسپارداعىدان كوپ بولىپ شىققان. بۇل جەردە ماسەلەنى شەشۋدىڭ ءبىر جولى عانا بار. ءبىز قارجىلاندىرۋ كولەمىن ۇلعايتامىز. باعدارلاما ءارى قاراي جۇمىس ىستەي بەرەدى»، - دەدى ۆەدومستۆو باسشىسى.

ونىڭ مالىمەتى بويىنشا، اتالعان ۇيىرمەلەرگە ءبولىنۋى ءتيىس قاراجاتتىڭ ناقتى كولەمى مەن مەرزىمىن جەرگىلىكتى اكىمدىكتەر ەسەپتەپ، انىقتايدى.

«ماسەلە قارجىدا ەمەس، تەگىن ۇيىرمە قىزمەتىن ۇسىنۋدىڭ شارتتارىن رەتتەۋگە كەلىپ تىرەلىپ تۇر. ۇكىمەت وتىرىسىندا ايتقانىمداي، قۇجاتتا بار، ناقتى ومىردە جوق جاندار پايدا بولىپ جاتىر. سوندىقتان بۇل ماسەلەنى جۋىق ارادا شەشۋىمىز كەرەك. بۇگىنگە دەيىن بۇل باعدارلامانىڭ مۇمكىندىگىن 500 مىڭ بالا پايدالانىپ ۇلگەرگەن. مەنىڭشە، بۇل تاماشا كورسەتكىش. ياعني، تەگىن ۇيىرمەلەر جابىلمايدى»، - دەدى داۋرەن ابايەۆ.

اۆتور: ەسىمجان ناقتىباي