يۆان دىچكو ا ق ش- تىڭ تاجىريبەلى بوكسشىسىمەن جەكپە- جەك وتكىزەدى

نۇر- سۇلتان. قازاقپارات - سۋپەراۋىر سالماقتاعى قازاقستاندىق بوكسشى يۆان دىچكونىڭ (11-0، 11 ك و) الداعى جەكپە- جەگىندەگى قارسىلاسى بەلگىلى بولدى، دەپ حابارلايدى قازاقپارات.

ۆكونتاكتە الەۋمەتتىك جەلىسىندەگى «قازاقستاننىڭ كاسىپقوي بوكسى» پاراقشاسىندا ءمالىم ەتىلگەندەي، ي. دىچكونىڭ ايقاسى 16-ءساۋىر كۇنى امەريكانىڭ مەرفريسبورو (تەننەسسي شتاتى) قالاسىندا وتەدى. وپپونەنتى - جەرگىلىكتى سپورتشى دەنيەل مارتتس (20-10-1، 17كو). كەزدەسۋ 10 راۋندقا ەسەپتەلگەن.

يۆان مۇنىڭ الدىنداعى جەكپە- جەگىن بىلتىرعى 18-جەلتوقساندا نۇر- سۇلتان قالاسىندا وتكىزدى. ول ءبىرىنشى راۋندتا تەحنيكالىق نوكاۋتپەن رەسەيلىك بوكس ارداگەرى الەكساندر ۋستينوۆتى (36-6-1، 27 ك و) جەڭدى. قازىرگى ۋاقىتتا دىچكو فلوريدا شتاتىندا دايىندىق وتكىزۋدە.