«قازاقستان حالقىنا» قورى ارقىلى الەمدەگى ەڭ قىمبات ءدارىنى كىمدەر الدى
«وتكەن اپتادا الەمدەگى ەڭ قىمبات جانە قازاقستان اۋماعىندا تىركەلمەگەن Zolgensma پرەپاراتى تۇڭعىش رەت ەلىمىزدە ومىرتقا بۇلشىقەتىنىڭ اتروفياسى دياگنوزى بار ناۋقاسقا قولدانىلدى. ءبىرىنشى بولىپ ءدارىنى ومىرتقا بۇلشىقەتىنىڭ اتروفياسى دياگنوزىمەن دۇنيەگە كەلگەن ءتورت ايلىق اينامكوز ايسينا الدى. ءدارىنى اعزاعا ەنگىزۋ جانە وڭالتۋ شاراسى ءساتتى ءوتتى. قازىر نارەستە تۋعان قالاسىندا. ءبىز ونىڭ وتباسىنا حابارلاستىق. ءدارى قابىلداعاننان كەيىن ءسابيدىڭ جاعدايى تۇراقتانعان»، - دەيدى «قازاقستان حالقىنا» قورىنىڭ وكىلى ايكەرىم ەسەنالى.
ودان بولەك فاتيما اسقار ەسىمدى ناۋقاس تا اتالعان ءدارىنى قولدانۋ مۇمكىندىگىنە يە بولعان.
«ول وسى اپتانىڭ سوڭىنا دەيىن «نوۆارتيس» كومپانياسىنان ساتىپ العان Zolgensma پرەپاراتىنىڭ ەكى ەكپەسىن الۋعا ءتيىس. امينا سۇلەيمەن مەن ايسەزىم جاڭبىربايعا دا وسى ءدارى سالىنادى»، - دەپ جازىلعان قوردىڭ باسپا ءسوز قىزمەتى ۇسىنعان مالىمەتتە.
ق ر دەنساۋلىق ساقتاۋ مينيسترلىگى ۇلتتىق انا مەن بالا ورتالىعىن جانە «University Medical Center» كورپوراتيۆتىك قورىنىڭ مەديتسينا ورتالىعىن «قازاقستان حالقىنا» قورى ارقىلى ساتىپ الىنعان Zolgensma ءدارىسىن ءتيىستى 4 بالانىڭ اعزاسىنا ەنگىزەتىن مەكەمە رەتىندە بەلگىلەگەن. شۆەيتساريانىڭ Novartis كومپانياسى شىعاراتىن Zolgensma پرەپاراتى گيننەستىڭ رەكوردتار كىتابىندا الەمدەگى ەڭ قىمبات ءدارى بولىپ تىركەلگەن.
