قاڭتاردا كوز جۇمعانداردىڭ اتى- ءجونى بۇكىل فاكتىلەر انىقتالعان سوڭ جاريالانادى

نۇر- سۇلتان. قازاقپارات - قاڭتار وقيعاسىندا قايتىس بولعانداردىڭ دەرەكتەرى بۇكىل فاكتىلەر داۋسىز انىقتالعان سوڭ جاريا ەتىلەدى.

ورتالىق كوممۋنيكاتسيالار قىزمەتىندە وتكەن بريفينگىدە ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ وسىلاي مالىمدەدى، دەپ حابارلايدى قازاقپارات ءتىلشىسى.

بريفينگ بارىسىندا باس پروكۋراتۋرا وكىلى كوكتوبە مۇناراسىن قورعاپ قازا بولعان ساربازدار تۋرالى مالىمەت كەلتىردى.

«الماتى اۋداندىق پوليتسيا باسقارماسى مەن «كوكتوبە» تەلەمۇناراسىن قىلمىسكەرلەر باسىپ الۋعا ارەكەت جاساعان كەزدە قىزمەت بورىشى بويىنشا ستراتەگيالىق وبەكتىلەردى قورعاعان قىزمەتكەرلەر قانبەتوۆ، اسىلحانوۆ جانە الماسوۆقا وق ءتيىپ قازا تاپتى»، - دەدى ەلدوس قيلىمبەتوۆ.

ونىڭ ايتۋىنشا، تالدىقورعان قالاسىندا 10 ادام 18 جاستاعى قارۋسىز ساربازدى ساباپ ولتىرگەن. «تالدىقورعان قالاسى الاڭىندا قوعامدىق ءتارتىپتى قامتاماسىز ەتۋ كەزىندە ۇلتتىق ۇلاننىڭ №5514 اسكەري ءبولىمىنىڭ مەرزىمدىك قىزمەتىنىڭ قارۋسىز اسكەري قىزمەتشىسى امانوۆقا ءبىر توپ - 10 قىلمىسكەر شابۋىل جاساعان. قاتىگەزدىكپەن ۇرىپ- سوعۋ سالدارىنان 18 جاستاعى امانوۆ كوپتەگەن دەنە جاراقاتىن العان. جاس جىگىت ەسىن جيماستان، جەدەل جاردەم اۆتوكولىگىندە كوز جۇمدى. قايعىلى قاڭتار بارىسىندا ادامداردىڭ قايتىس بولۋىنىڭ بارلىق فاكتىلەرى بويىنشا مۇقيات تەرگەۋ جۇرگىزىپ جاتىر. ولاردىڭ قورىتىندىسى داۋسىز دالەلدەر انىقتالعاننان كەيىن جاريا ەتىلەدى»، - دەدى ق ر باس پروكۋراتۋراسى 1-قىزمەت باستىعىنىڭ ورىنباسارى.

اۆتور: ەسىمجان ناقتىباي