قازاقستاندىقتارعا پاتەر ۇرىسىنان ساق بولۋدىڭ جولدارى ايتىلدى

None
None
نۇر-سۇلتان. قازاقپارات - ىشكى ىستەرى ورگاندارى ماماندارىنىڭ ايتۋىنشا، پاتەر توناۋ جالپى بارلىق ۇرلىقتىڭ 20,5 پايىزىن قۇرايدى ەكەن.

سونداي-اق، سالا ماماندارى توناۋشىلار ءۇيدىڭ ەسىك، تەرەزەسىن بۇزىپ كىرۋدىڭ ءتۇرلى ءادىس- ءتاسىلىن مەڭگەرگەنىن ايتىپ وتىر. وسى ورايدا ەلىمىزدىڭ ىشكى ىستەر مينيسترلىگى قازاقستاندىقتارعا پاتەر ۇرىسىنان ساق بولۋدىڭ بىرنەشە جولىن ايتتى، دەپ حابارلايدى قازاقپارات ءتىلشىسى.

«تۇرعىندارعا ءوز ءۇيىن ۇرلىق-قارلىقتان ساقتاۋدىڭ قاراپايىم ەرەجەلەرىن ساقتاۋعا كەڭەس بەرەمىز. الدىمەن ءۇي ەسىگىنىڭ قۇلپىن تاڭداۋدا ەرەكشە ءمان بەرۋ كەرەك. قۇلىپ سەنىمدى ءارى ساپالى بولۋى ءتيىس. قۇلىپتان بولەك، ىشتەن جاۋىپ الاتىن ىلگىشتىڭ بولعانى ابزال. سونىمەن قاتار سىرتقى ەسىكتىڭ مەتالدان بولعانى ءجون. سەبەبى اعاش ەسىكتى بۇزىپ كىرۋ وڭايلاۋ. تاعى ءبىر ماڭىزدى جايت، پاتەر توناعاندا ۇرىلار ەسىكتەن ەمەس تەرەزەدەن كىرىپ جاتادى. ولار ءتۇرلى پلاستيكالىق تەرەزەنى اشۋدىڭ ءمانىسىن ءبىلىپ العان. سوندىقتان تەرەزەگە قورعانىش رەتىندە تەمىرتور ورناتۋ كەرەك. وسى ورايدا تەرەزەگە تەمىرتور ورناتۋ تەك قانا 1-2-قاباتتاعى پاتەر تۇرعىندارىنا عانا ەمەس ەڭ سوڭعى قاباتتاعى پاتەر يەلەرىنە دە قاتىستى»، - دەدى ق ر ءى ءى م كريمينالدىق پوليتسيا دەپارتامەنتىنىڭ اسا ماڭىزدى ىستەر جونىندەگى اعا جەدەل ۋاكىلى ساعىندىق جانتەمىروۆ مينيسترلىكتە وتكەن باسپا ءسوز ءماسليحاتىندا.

ودان بولەك، مامان مۇمكىندىك بولعان جاعدايدا ۇيگە «دابىل» تەتىگىن ورناتۋعا كەڭەس بەردى. «ۇيگە بوگدە ادام كىرگەن جاعدايدا دەرەۋ دابىل سوعادى. ال، ءۇي يەسى بولسا شۇعىل شارا قابىلداي الادى. پاتەر توناۋشىلاردان قورعانۋدىڭ تاعى ءبىر ءتاسىلى GSM حابارلاما دابىلى. ياعني ۇيىڭىزگە ۇرى تۇسكەن جاعدايدا ءسىزدىڭ ۇيالى تەلەفونىڭىزعا sms حابارلامادا كەلەدى. وسى ورايدا تۇرعىندارعا ايتار تاعى ءبىر كەڭەسىمىز، ۇيدە ءىرى كولەمدە قارجى نەمەسە باعالى زاتتاردى ساقتاماڭىزدار»، - دەيدى ول. بۇعان دەيىن حابارلاعانىمىزداي ەلىمىزدە پاتەر توناۋ قىلمىسى %33,4 عا ازايعان.

سوڭعى جاڭالىقتار