رەسەيلىك مانەرلەپ سىرعاناۋشى ديماش قۇدايبەرگەننىڭ انىمەن ەرەكشە ونەر كورسەتتى

وسكەمەن. قازاقپارات - رەسەيلىك مانەرلەپ سىرعاناۋشى، 2018 -جىلعى وليمپيادا ويىندارىنىڭ ەكى دۇركىن كۇمىس جۇلدەگەرى، ەكى دۇركىن الەم چەمپيونى ەۆگەنيا مەدۆەديەۆا قازاقستاندىق ءانشى ديماش قۇدايبەرگەننىڭ ورىنداۋىنداعى «Your love» انىمەن ەرەكشە ونەر كورسەتتى، دەپ حابارلايدى قازاقپارات ءتىلشىسى Dimashnews.com سايتىنا سىلتەمە جاساپ.

3-ساۋىردە سانكت- پەتەربۋرگتەگى «يۋبيلەينىي» سپورت سارايىندا يليا اۆەربۋحتىڭ «مۇز ءداۋىرى. چەمپيوندار» اتتى مۇز شوۋى ءوتتى. وندا رەسەيلىك مانەرلەپ سىرعاناۋشى، 2018 -جىلعى وليمپيادا ويىندارىنىڭ ەكى دۇركىن كۇمىس جۇلدەگەرى ەۆگەنيا مەدۆەديەۆا الەمگە تانىمال قازاقستاندىق ءانشى ديماش قۇدايبەرگەننىڭ كومپوزيتسياسىمەن ونەر كورسەتتى.

ەۆگەنيانىڭ ءنومىرى ەرەكشە ادەمى بولدى. ونىڭ نازىك قيمىلدارى مۋزىكامەن شەبەر ۇندەسكەن. اق مۇزعا القىزىل كويلەكپەن شىققان مانەرلەپ سىرعاناۋشى ديماش انىندەگى جارالى جۇرەككە ۇقسادى. ايتا كەتەيىك، ديماش العاش رەت كومپوزيتور يگور كرۋتويدىڭ لارا فابياننىڭ ولەڭدەرىنە جازعان تۋىندىسىن 2020 -جىلى 8-ناۋرىزدا ماسكەۋدە ديزاينەر ۆالەنتين يۋداشكيننىڭ مەرەيتويلىق كەشىندە ورىنداعان بولاتىن.

اۆتور: تالعاتجان مۇحامەتبەك ۇلى