اكىمدەردىڭ كارانتيندى ۋاقتىلى قولدانباۋىنان ەپيزووتيالىق احۋال ناشارلادى - اۋىل شارۋاشىلىعى ءمينيسترى

نۇر-سۇلتان. قازاقپارات - كەيبىر اۋماقتار اكىمدەرىنىڭ كارانتيندى جانە شەكتەۋ ءىس- شارالارىن ۋاقتىلى قولدانباۋى جەرگىلىكتى جەرلەردەگى ەپيزووتيالىق احۋالدىڭ ناشارلاۋىنا اكەلدى.

بۇل تۋرالى ماجىلىستەگى ۇكىمەت ساعاتىندا ق ر اۋىل شارۋاشىلىعى ءمينيسترى ەربول قاراشوكەيەۆ ءمالىم ەتتى، دەپ حابارلايدى قازاقپارات ءتىلشىسى.

«مەملەكەت باسشىسى 2021 -جىلعى 1-قىركۇيەكتەگى «حالىق بىرلىگى جانە جۇيەلى رەفورمالار - ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا ۆەتەريناريا جۇيەسىن رەفورمالاۋ بويىنشا ناقتى مىندەتتەر قويدى. ولار: ورتالىق پەن وڭىرلەر اراسىنداعى فۋنكتسيالار مەن وكىلەتتىكتەردىڭ ارا جىگىن ناقتى اجىراتۋ، پروتسەستەردى سيفرلاندىرۋ جانە دەرەكتەردى جيناۋ مەن بەرۋدى اۆتوماتتاندىرۋ، كادرلار دايارلاۋ جانە جالاقىنى ارتتىرۋ. مينيسترلىك قويىلعان مىندەتتەردى ورىنداۋ ءۇشىن بيىلعى جاعدايعا مۇقيات تالداۋ جۇرگىزدى جانە ۆەتەريناريا جۇيەسىن رەفورمالاۋ ءۇشىن قاجەتتى ءىس- شارالار ازىرلەدى»، - دەدى ە. قاراشوكەيەۆ.

ونىڭ ايتۋىنشا، ۇسىنىلعان ءىس-شارالار ساراپشىلار قاۋىمداستىعىمەن، اكىمدىكتەرمەن، مەملەكەتتىك ورگاندارمەن، بيزنەسپەن، سالالىق قاۋىمداستىقتارمەن تالقىلاندى. جۇمىس توبىنىڭ وننان استام وتىرىسى، ونىڭ ىشىندە وڭىرلەرگە كوشپەلى وتىرىستار وتكىزىلدى. سونداي-اق، بارلىق نەگىزگى رەفورمالار بويىنشا ۇكىمەت پەن پرەزيدەنت اكىمشىلىگىندە تالقىلاۋ جۇرگىزىلىپ، وندا نەگىزگى تاسىلدەر ماقۇلداندى.

«بۇدان باسقا، مينيسترلىكتىڭ باستاماسى بويىنشا 2021 -جىلعى ناۋرىزدان قىركۇيەككە دەيىن قازاقستان رەسپۋبليكاسى ءۇشىن دۇنيەجۇزىلىك جانۋارلار دەنساۋلىعى ۇيىمى حالىقارالىق ساراپشىلارىنىڭ ەكى ميسسياسى وتكىزىلدى، ولاردىڭ قورىتىندىلارى بويىنشا ءبىز قازاقستاننىڭ ۆەتەريناريا قىزمەتىنىڭ جۇمىسىن كۇشەيتۋ جونىندە ءتيىستى ۇسىنىمدار الدىق. رەفورمالاردى ەنگىزۋدى كەزەڭ- كەزەڭمەن جۇزەگە اسىرۋ جوسپارلانۋدا، بۇل ۆەتەريناريالىق قىزمەت جۇمىسىنىڭ تيىمدىلىگىن ارتتىرۋعا جانە بولاشاقتا ونى جاڭا ساپالى دەڭگەيگە كوتەرۋگە مۇمكىندىك بەرەدى»، - دەدى مينيستر.

ۆەتەريناريا بويىنشا رەفورمالاردى ازىرلەۋدىڭ باستاپقى كەزەڭىندە نورماتيۆتىك- قۇقىقتىق اكتىلەردەگى قايشىلىقتارعا، سونداي- اق ۆەتەريناريالىق زاڭنامانىڭ سول نەمەسە وزگە دە نورمالارىن پراكتيكادا قولدانۋدىڭ جەتىلمەگەندىگىنە تالداۋ جۇرگىزىلدى.

«ەپيزووتيالىق وشاقتاردى زەرتتەپ-قاراۋدى جۇرگىزۋ بولىگىندە قاداعالاۋ جانە ىسكە اسىرۋ فۋنكتسيالارىنىڭ ەگجەي- تەگجەيلى فۋنكتسيونالىنىڭ بولماۋى، ءتيىستى اۋماقتار اكىمدەرىنىڭ كارانتيندى جانە شەكتەۋ ءىس- شارالارىن ۋاقتىلى قولدانباۋى جەرگىلىكتى جەرلەردەگى ەپيزووتيالىق احۋالدىڭ ناشارلاۋىنا اكەلدى، اسىرەسە كارانتيندى بەلگىلەۋ كەزىندە. كارانتيندى بەلگىلەۋ 90 كۇنگە دەيىن كەشىكتىرىلگەن فاكتىلەر بار، سايكەسىنشە وشاقتى جويۋ ءىس- شارالارى ۋاقتىلى جۇزەگە اسىرىلمادى، بۇل ينفەكسيانىڭ تارالۋىنا اكەلدى»، - دەدى ۆەدومستۆو باسشىسى.