ۇلى بريتانيادا كوروناۆيرۋستىڭ مۋتاتسيالانعان جاڭا ءتۇرى انىقتالدى

نۇر- سۇلتان. قازاقپارات – ۇلى بريتانيادا كوروناۆيرۋستىڭ جاڭا مۋتاتسيالانعان ءتۇرى انىقتالدى. شانحايدىڭ 26 ميلليون تۇرعىنى كوروناۆيرۋس انتيدەنەلەرىنە اناليز تاپسىرۋعا مىندەتتەلدى.

بۇل تۋرالى قازاقستاندا COVID-19 تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ Telegram-كانالىندا ايتىلدى، دەپ حابارلايدى قازاقپارات.

ۇلى بريتانيادا كوروناۆيرۋستىڭ «وميكرون» شتامىنىڭ جاڭا مۋتاتسيالانعان ءتۇرى – XE انىقتالدى. ساراپشىلاردىڭ پىكىرىنشە XE الدىڭعى نۇسقالارعا قاراعاندا قانشالىقتى جۇقپالى ەكەندىگى تۋرالى قورىتىندى جاساۋ ازىرگە ەرتەرەك. ۇلى بريتانيانىڭ دەنساۋلىق ساقتاۋ اگەنتتىگى جاڭا نۇسقانى زەردەلەۋدە. ازىرگە ساراپشىلار بۇل مۋتاتسيانى جۇقتىرۋ قارقىنى «ستەلس- وميكرون» نەمەسە «وميكرون» BA.2 ءتۇرىنىڭ تارالۋىنان ايتارلىقتاي ەرەكشەلەنبەيتىنىن اتاپ ءوتتى. الايدا، سوڭعى زەرتتەۋلەر بويىنشا XE- ءدىڭ جۇعۋ جىلدامدىعى «ستەلس- وميكرونعا» قاراعاندا %9,8 جوعارى.

3-ساۋىردە شانحاي بيلىگى شامامەن 26 ميلليون حالقى بار قالانىڭ بارلىق تۇرعىنىن انتيدەنەلەردىڭ بار- جوعىن تەكسەرۋگە جانە انىقتالعان وڭ ناتيجەلەر تۋرالى جەدەل حابارلاۋعا مىندەتتەدى. دۇيسەنبىدە ازاماتتار ۆيرۋستىڭ بار- جوقتىعىن انىقتاۋ ءۇشىن پ ت ر تەستىنى تاپسىرۋى كەرەك. جۋرناليستەردىڭ ايتۋىنشا، قالادا كوروناۆيرۋس ينفەكتسياسىنىڭ كوپتەگەن جاعدايلارى سيمپتومسىز بولىپ تابىلادى. جالپى، كونتينەنتالدى قىتايدا سوڭعى تاۋلىكتە COVID-19 جۇقتىرۋدىڭ كلينيكالىق بەلگىلەرى بار 1506 جانە سيمپتومسىز 11781 دەرەگى انىقتالدى. بارلىعى دا ۆيرۋستىڭ ەل ىشىندە تاراعان جاعدايلارى.