ۋكراينانىڭ مادەني مۇرالارىنا قاۋىپ ءتونىپ تۇر – يۋنەسكو

نۇر- سۇلتان. قازاقپارات - يۋنەسكو ۋكراينانىڭ مادەني مۇراسىنا قاۋىپ ءتونىپ تۇرعانىن ايتىپ، دابىل قاعۋدا، دەپ حابارلايدى قازاقپارات ب ۇ ۇ جاڭالىقتار سايتىنا سىلتەمە جاساپ.

ۋكراينانىڭ لۆوۆ پەن كيەۆ قالالارىندا ورنالاسقان جەتى دۇنيەجۇزىلىك مۇرا بار، ودەسسا مەن حاركوۆ تا شىعارماشىلىق قالالار جەلىسىنە كىرەدى. ال مەملەكەتتىڭ كەيبىر ۇلتتىق مۇراعاتتارى يۋنەسكو- نىڭ «الەمنىڭ جادىسى» تىزىلىمىنە ەنگىزىلگەن. وندا سوعىس باستالعالى بەرى يۋنەسكو ءوز مانداتى اياسىندا، ونىڭ ىشىندە مادەنيەتتى قورعاۋ باعىتىندا ناقتى شارالار قابىلداپ جاتىر.

ۇيىم مادەني نىساندار مەن ەسكەرتكىشتەردى 1954 -جىلعى گااگا كونۆەنتسياسىنىڭ «كوگىلدىر قالقان» ەرەكشە ەمبلەماسىمەن بەلگىلەۋ ءۇشىن ۋكراينا بيلىگىمەن بايلانىس ورناتادى. ونداعى ماقسات - قاساقانا نەمەسە كەزدەيسوق زيان كەلتىرمەۋ ءۇشىن قارۋلى قاقتىعىس جاعدايىندا مادەني قۇندىلىقتاردى قورعاۋ. ءبىرىنشى كەزەكتەگى مىندەت - حالىقارالىق قۇقىققا سايكەس قورعالاتىن اۋداندار رەتىندە ولاردىڭ ەرەكشە مارتەبەسىن ەسكە سالۋ ءۇشىن مادەني مۇرا ەسكەرتكىشتەرىنە بەلگى قويۋ. جاقىن كۇندەرى ۋكراينانىڭ مادەنيەت سالاسىنداعى ماماندارىمەن - دۇنيەجۇزىلىك مۇرا نىساندارىنىڭ باسشىلارىمەن، مۇراجاي ديرەكتورلارىمەن، جىلجىمايتىن جانە جىلجىمالى مۇرا نىساندارىنا جاۋاپتى ازاماتتارمەن شۇعىل قاجەتتىلىكتەردى انىقتاۋ ماقساتىندا جاڭا كەزدەسۋلەر جوسپارلانعان. سونىمەن قاتار يۋنەسكو ۋكراينانىڭ قاۋىپ- قاتەرگە تاپ بولعان مادەني مۇراسىن قورعاۋ ءۇشىن حالىقارالىق سەرىكتەستەردى تارتپاق. سونىڭ ىشىندە مادەني قۇندىلىقتاردى ساقتاۋ جانە قالپىنا كەلتىرۋ جونىندەگى حالىقارالىق زەرتتەۋ ورتالىعىن، «كوگىلدىر قالقان» كوميتەتىن، حالىقارالىق مۇراجايلار كەڭەسىن، ەسكەرتكىشتەر مەن كورىكتى جەرلەردى ساقتاۋ جونىندەگى كەڭەستى جانە تاعى باسقالارىن جۇمىلدىرادى.