تاسىعان سۋ باتىستاعى تاعى ءبىر رەسپۋبليكالىق تاسجولدى شايىپ كەتتى - ۆيدەو
«قازاۆتوجول» مالىمەتى بويىنشا وقيعا 1-ءساۋىر كۇنى ساعات 17.30-دا سامارا- شىمكەنت جولىنىڭ 479-شاقىرىمىندا قاراتوبە اۋدانى قوسكول اۋىلى تۇسىندا بولدى. كۇرت ەرىگەن قار سۋى اۆتوجولدان اسىپ كەتكەن.
اتالمىش مەكەمە كۇشىمەن سۋ تاسقىنىنا قارسى كۇرەس شارالارى جۇرگىزىلدى.
«اۆتوجول جيەگىنىڭ بويىنا قۇم سالىنعان قاپتار مەن ەسكەرتۋ بەلگىلەرى قويىلدى. ءتيىستى تەحنيكالار تارتىلىپ، تاۋلىك بويى كەزەكشىلىك ۇيىمداستىرىلدى. 2-ساۋىردە تاڭعى ساعات 05.00-دە سۋ تاسقىنى توقتادى، وسى تۇستاعى قۇبىر 60 پايىزعا جۇمىس ىستەپ تۇر. جاعداي باقىلاۋدا. رەسپۋبليكالىق ماڭىزى بار سامارا- شىمكەنت تاس جولى اشىق»، دەپ حابارلادى ۆەدومستۆودان.
ب ق و ت ج دەپارتامەنتىنىڭ باسپا ءسوز قىزمەتى وقيعانى راستاپ، قازىرگى كەزدە قالپىنا كەلتىرۋ جۇمىستارى جۇرگىزىلىپ جاتقانىن جەتكىزدى. كولىك قوزعالىسى توقتاعان جوق. بۇعان دەيىن حابارلانعانداي، اقتوبە وبلىسىندا تاسىعان سۋ رەسپۋبليكالىق ماڭىزى بار جولدى جىرىپ كەتكەن بولاتىن.
