قازاقتىڭ كيىز ءۇيى تەل-اۆيۆتە وتكەن تانىمال حالىقارالىق تۋريستىك كورمەگە قويىلدى
بۇل تۋرالى قازاقپارات ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.
باسپا ءسوز قىزمەتىنىڭ مالىمەتتەرىنە قاراعاندا، كوروناۆيرۋس پاندەمياسى باستالعاننان بەرى العاش رەت وففلاين فورماتتا وتكەن كورمەگە بىرنەشە مىڭ قوناق، سونداي-اق الەمنىڭ 50 دەن استام ەلىنىڭ تۋريستىك وكىلدەرى جينالدى.
تۋريستىك جارمەڭكەنى يزرايل پرەزيدەنتى يتسحاك گەرتسوگ اشتى.
قازاق كيىز ءۇيى ءىس-شارا قوناقتارىنىڭ ەرەكشە ءىلتيپاتىنا بولەندى، ال يزرايلدىڭ تۋريزم ءمينيسترى يوەل رازۆوزوۆ ەكسپوزيتسيانى العاشقىلاردىڭ ءبىرى بولىپ تاماشالادى.
كورمەگە كەلۋشىلەر قازاق حالقىنىڭ سالت-داستۇرلەرىمەن تانىسىپ، كيىز ءۇي ەلەمەنتتەرىنىڭ قاسيەتتى ماعىناسى تۋرالى ءبىلىپ، قازاق تاعامدارىنىڭ ءدامىن تاتىپ، ۇلتتىق كيىمدەردى كيىپ كورىپ، قازىرگى قازاقستاننىڭ تابيعاتى، ساۋلەتى مەن تۇرعىندارى بەينەلەنگەن فوتوسۋرەتتەردى تاماشالاپ، دومبىرانىڭ اۋەنىنە قۇلاق ءتۇردى.
IMTM شىعىس جەرورتا تەڭىزى ايماعىنداعى تۋريزم سالاسىنداعى ەڭ ءىرى كورمە بولىپ تابىلادى جانە يزرايلدىڭ تۋريزم مينيسترلىگى، قوناق ۇيلەر قاۋىمداستىعى، تۋريستىك اگەنتتىكتەر قاۋىمداستىعى جانە يزرايل تۋروپەراتورلار قاۋىمداستىعىنىڭ كەڭ قولداۋىمەن وتەدى.
