قازاقستاندا ۇكىمەتتىك ەمەس ۇيىمداردى قارجىلاندىرۋدىڭ جاڭا مەحانيزمى ەنگىزىلەدى

نۇر-سۇلتان. قازاقپارات - ەلىمىزدە ۇكىمەتتىك ەمەس ۇيىمداردى قارجىلاندىرۋدىڭ جاڭا مەحانيزمى ازىرلەنىپ جاتىر.

بۇل تۋرالى ق ر اقپارات جانە قوعامدىق دامۋ ءمينيسترى اسقار ۋماروۆ ءمالىم ەتتى، دەپ حابارلايدى قازاقپارات ءتىلشىسى.

«گرانتتىق قارجىلاندىرۋ سالاسىنداعى پروبلەمالاردى شەشۋ ءۇشىن مينيسترلىك قازىرگى ۋاقىتتا حالىقارالىق تاجىريبە نەگىزىندە ازاماتتىق قوعام ساراپشىلارىمەن بىرلەسە وتىرىپ، گرانتتىق قارجىلاندىرۋ سالاسىنداعى زاڭنامانى جەتىلدىرۋ بويىنشا جۇمىس جۇرگىزۋدە. گرانتتاردى حالىقتىڭ قاجەتتىلىگىنە باعىتتاۋعا مۇمكىندىك بەرەتىن وزەكتى باعىتتار بويىنشا پۋلدار قالىپتاستىرۋ ارقىلى گرانتتاردى جوسپارلاۋدىڭ جاڭا فورماتىن ەنگىزۋ ۇسىنىلادى»، - دەپ جاۋاپ بەردى اسقار ۋماروۆ دەپۋتاتتىق ساۋالعا.

ءمينيستردىڭ مالىمدەۋىنشە، اتالعان شارا حالىقارالىق پراكتيكادا كەڭىنەن پايدالانىلاتىن «تومەننەن جوعارى» ءتاسىلىن ەنگىزۋگە مۇمكىندىك بەرەدى. سونىمەن قاتار قوعامدىق باستامالاردىڭ قازىرگى كەزدەگى كۇن تارتىبىنە يكەمدەلىپ، جەدەل دەن قويۋدى قامتاماسىز ەتەدى.

«سونداي-اق، گرادۋيرلەنگەن گرانتتار جۇيەسىن ەنگىزۋ ۇسىنىلادى. گرانتتىڭ تۇرىنە قاراي قارجىلاندىرۋ كولەمىنە، ىسكە اسىرۋ مەرزىمدەرىنە، ۇ ە ۇ ءۇشىن كونكۋرسقا قاتىسۋ شارتتارىنا قويىلاتىن ءارتۇرلى تالاپتار، ەسەپتىلىككە قويىلاتىن تالاپتار ايقىندالاتىن بولادى. مۇنداي ءتاسىل گرانتتىق قارجىلاندىرۋ راسىمدەرىن جەڭىلدەتۋگە مۇمكىندىك بەرەدى»، - دەيدى ول.

بۇل نورمالار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ۆولونتەرلىك قىزمەت، قايىرىمدىلىق، مەملەكەتتىك الەۋمەتتىك تاپسىرىس جانە ۇكىمەتتىك ەمەس ۇيىمدارعا ارنالعان گرانتتار ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى تۋرالى» زاڭ جوباسىندا كوزدەلگەن، ول بۇگىنگى كۇنى ق ر ءماجىلىسى دەپۋتاتتارىنىڭ قاراۋىندا جاتىر.

«جۇمىس توبىنىڭ 13 وتىرىسى جانە زاڭ جوباسىنىڭ ءبىرىنشى وقىلىمى بولدى. سونىمەن قاتار، 2021-جىلدان باستاپ گرانت بەرۋ پروتسەسىنىڭ اشىقتىعىن قامتاماسىز ەتۋ ماقساتىندا گرانت الۋشىلاردى ايقىنداۋ جونىندەگى ساراپتامالىق كوميسسيالاردىڭ وتىرىستارى گرانتتىق قارجىلاندىرۋ وپەراتورىنىڭ سايتىندا جانە الەۋمەتتىك جەلىلەرىندە تىكەلەي ەفيردە كورسەتىلەدى. سونداي-اق، ساراپتاما كوميسسياسىنىڭ مۇشەلەرى تىكەلەي ەفيردە كەزدەيسوق ادىسپەن ساراپشىلار تىزىلىمىنە ەنگىزىلگەن ادامدار قاتارىنان قالىپتاستىرىلادى»، - دەلىنگەن رەسمي جاۋاپتا.