ءبىلىم ءمينيسترى ۇلكەن الەۋەتكە يە وقۋ مەن كاسىپ تۇرلەرىن اتادى

نۇر- سۇلتان. قازاقپارات - ق ر ءبىلىم جانە عىلىم ءمينيسترى اسحات ايماعامبەتوۆ ۇلكەن الەۋەتكە يە وقۋ مەن كاسىپ تۇرلەرىن اتادى، دەپ حابارلايدى قازاقپارات ءتىلشىسى.

«بولاشاق ماماندىقتى تاڭداۋعا قاتىستى دا ايتا كەتەيىن. جيناعان بالل كولەمىنە نەمەسە باسقا ءبىر فاكتورلارعا بايلانىستى قابىلدانعان شەشىم قاتە ەكەنىن ەستە ساقتاڭىز. وقۋ مەن كاسىپتىڭ 3 ءتۇرى ۇلكەن الەۋەتكە يە دەپ ويلايمىن. ءبىرىنشى - جاس مۇعالىم. قازىر بۇل ماماندىق تۇراقتىلىقتىڭ كەپىلىنە اينالدى. ەلىمىزدە جاقسى مۇعالىمدەرگە سۇرانىس وتە جوعارى. قازىر جالاقى دا، دامۋ مەن مانساپتىق ءوسۋ مۇمكىندىكتەرىنە دە جاعداي جاسالعان. سونىمەن قاتار وسى باعىتقا 9,5 مىڭ گرانت ءبولىنىپ، ەڭ جوعارى ستيپەنديا تاعايىندالادى، ودان بولەك، جالاقى جىل سايىن 25 پايىزعا ءوسىپ وتىرادى»، - دەپ جازدى مينيستر Facebook پاراقشاسىندا مەكتەپ بىتىرەتىن تۇلەكتەرگە ارناعان حاتىندا.

سونىمەن قاتار ول ينجەنەرلىك مەن عىلىمنىڭ الەۋەتى زور ەكەندىگىن اتاپ ءوتتى.

«ەكىنشى - جاس ينجەنەر. پرەزيدەنت تەحنيكالىق ماماندىقتاردىڭ ماڭىزدىلىعىن اتاپ وتكەن بولاتىن. مىقتى ينجەنەر بولساڭىز، وندا ءسىز كەز كەلگەن جەردە باسەكەگە قابىلەتتى بولاسىز. وزدەرىڭىز بىلەتىندەي، جۇزدەگەن جاس قازاقستاندىق Google، Amazon جانە الەمگە ايگىلى باسقا دا كومپانيالاردا جۇمىس ىستەيدى.

ءۇشىنشى - جاس عالىم. قازاقستان عىلىمى قارقىندى دامىپ كەلەدى. وتاندىق عالىمدار QazVac ۆاكسيناسىن جاسادى. سونداي- اق جاس عالىمدار بۇكىل الەم بويىنشا عىلىمي جارىستاردا الدىڭعى ورىنداردا. ولاردىڭ جوبالارىنا شەتەلدىك كومپانيالار سەرىكتەستىك ۇسىنىپ ءجۇر. ودان بولەك، ءبىز عالىمدارعا بارىنشا قولايلى جاعداي جاساپ جاتىرمىز. اتاپ ايتقاندا، عىلىمي گرانتتار ءبولۋ، شەتەلدىك عىلىمي ورتالىقتاردا تاعىلىمدامادان ءوتۋ جانە تاعى باسقالارى. سىزدەردىڭ ارالارىڭىزدان دا ساتبايەۆ ءىسىن جالعاستىرۋشى مىقتى عالىم شىعۋى ابدەن مۇمكىن»، - دەدى اسحات ايماعامبەتوۆ.

اۆتور: مارلان جيەمباي