قاسىم-جومارت توقايەۆ ۋكرايناداعى جاعدايعا قاتىستى پىكىر ءبىلدىردى
«ۇستانىمىمىز مەملەكەتىمىزدىڭ قاۋىپسىزدىگىن، ەگەمەندىگىن، اۋماقتىق تۇتاستىعىن قامتاماسىز ەتۋ تۇرعىسىندا بولۋى ءتيىس. 2010 -جىلى ە ق ى ۇ سامميتىن وزىندە قابىلداعان ەل رەتىندە ءبىز ەۋرازيالىق قاۋىپسىزدىكتىڭ تۇتاستىعى ۇستانىمىن قولدايمىز. بۇل جايىندا مەن 10-اقپانداعى ماسكەۋگە ساپارىم بارىسىندا دا ايتتىم. تۇتاستىق ۇستانىمى جانە قاۋىپسىزدىكتىڭ ورتاقتىعى ءوزارا سەنىم نەگىزىندەگى ءوزارا تۇسىنىستىكتى بىلدىرەدى. وكىنىشكە وراي، مۇنداي جاعداي ورىن العان جوق. مينيسك كەلىسىمى قاعاز كۇيىندە قالىپ قويدى. بۇل ۋكراينا اۋماعىنداعى اسكەري ءىس- قيمىلعا الىپ كەلدى. گەوساياسي احۋال تەڭدەسسىز تۇردە شيەلەنىستى»، - دەدى مەملەكەت باسشىسى «امانات» پارتياسىنىڭ كەزەكتەن تىس سەزىندە.
سوندىقتان قازاقستان پرەزيدەنتى ەكى مەملەكەتتى دە ۋاعدالاستىق پەن كەلىسىمگە كەلۋى ءۇشىن كەلىسسوزدەر ۇستەلىنە وتىرىپ، ورتاق ءتىل تابۋعا شاقىردى.
«باسقا جولى جوق. بەيبىت ءومىرسىز دامۋ دا بولمايدى. قازاقستان ءوز تاراپىنان بارلىق جاردەمىن، ونىڭ ىشىندە اراعايىندىق قىزمەتىن كورسەتۋگە دايىن. ارينە، ەگەر ول قاجەت بولسا»، - دەدى قاسىم- جومارت توقايەۆ.
