سۋبسيديانى تەك ءىرى كاسىپكەرلەر عانا الادى – سەناتورلار
قازاقستانداعى شاعىن جانە ورتا بيزنەسكە كورسەتىلەتىن مەملەكەتتىك قولداۋ شارالارىنىڭ تيىمدىلىگى تالقىلاۋدىڭ باستى تاقىرىبى بولدى. كوميتەت ءتوراعاسى داۋرەن ادىلبەكوۆ وتىرىستى اشا كەلىپ، شاعىن جانە ورتا بيزنەس جۇمىسىنىڭ دامۋىنا كەدەرگى كەلتىرىپ وتىرعان ءبىرقاتار ماڭىزدى پروبلەمالار مەن كەدەرگىلەردى ءوتتى.
«شاعىن جانە ورتا بيزنەسكە نەسيە بەرۋ جۇيەسىندە پروبلەمالار بار. پايىزدىق مولشەردىڭ كوپتىگى، بورىش اۋىرتپالىعى، قارىزدىڭ مەرزىمىن وتكىزىپ الۋ ءقاۋپىنىڭ كوبەيۋى سالدارىنان كاسىپكەرلەرگە نەسيەگە دەگەن سۇرانىس تومەندەپ بارادى. ودان باسقا، قارجىلاندىرۋداعى قىمباتشىلىق پەن كەپىلمەن قامتاماسىز ەتۋدا جوعارى تالاپتار قويۋ پروبلەمالارى بار. بيزنەس وكىلدەرىنىڭ پىكىرىنشە، ەگەر ەكىنشى دەڭگەيدەگى بانكتەردەن نەسيە الاتىن بولسا، بۇگىنگى تاڭدا %14-15- عا بەرىلەدى»، - دەدى داۋرەن ادىلبەكوۆ.
سەناتورلار سۋبسيديالاردى مەملەكەتتەن تەك ءىرى كاسىپكەرلەر عانا الىپ، شاعىن بيزنەس شەتتە قالادى دەپ سانايدى. دەپۋتاتتاردى سونداي- اق سۋبسيديا بەرۋ سالاسىنداعى «قولداۋ» اقپاراتتىق جۇيەسىنىڭ جەتىلدىرىلمەۋى ماسەلەسى دە الاڭداتادى، ول سىبايلاس جەمقورلىق تاۋەكەلدەرىن الىپ تاستاۋدىڭ ورنىنا، كەرىسىنشە، ولاردىڭ ۇلعايۋىنا ىقپال ەتۋى مۇمكىن. ۇلتتىق ەكونوميكا ءمينيسترىنىڭ ورىنباسارى تيمۋر جاقسىلىقوۆ ايتىلعان پروبلەمالاردى شەشۋ تۋرالى ءوز ويلارىن ورتاعا سالدى.
ول شاعىن جانە ورتا كاسىپكەرلىكتى دامىتۋدىڭ 2030 -جىلعا دەيىنگى تۇجىرىمداماسىندا شاعىن جانە ورتا بيزنەسكە باسا نازار اۋدارا وتىرىپ، مەملەكەتتىك قولداۋ شارالارى كوزدەلەتىنىن حابارلادى. ولاردىڭ قاتارىندا بيزنەستىڭ باسىم سالالارىن دامىتۋعا باعدارلاۋ، بيزنەستىڭ بارلىق سۋبەكتىلەرىن قولداۋدان شاعىن جانە ورتا كاسىپكەرلىكتى دامىتۋ باسىمدىعىنا كەزەڭ- كەزەڭىمەن كوشۋ، سونداي- اق شاعىن جانە ورتا بيزنەستى كرەديتتەۋگە ميكروقارجى ۇيىمدارىن تارتۋ ءۇشىن جاعدايلار جاساۋ بار. سونىمەن قاتار، وتىرىسقا ساۋدا جانە ينتەگراتسيا، اۋىل شارۋاشىلىعى، يندۋستريا جانە ينفراقۇرىلىمدىق دامۋ، قارجى مينيسترلىكتەرىنىڭ، سونداي- اق «اتامەكەن» ۇلتتىق كاسىپكەرلەر پالاتاسىنىڭ جانە «دامۋ» كاسىپكەرلىكتى دامىتۋ قورىنىڭ وكىلدەرى قاتىستى. سەناتور داۋرەن ادىلبەكوۆ وتىرىستى قورىتىندىلاي كەلىپ، مەملەكەتتىك قولداۋدىڭ قولدانىستاعى شارالارى ازىرگە كۇتىلگەن ناتيجە بەرمەگەنىن تاعى دا اتاپ ءوتتى.
دەپۋتاتتار وسىعان بايلانىستى سالالىق مەملەكەتتىك ورگاندارعا بيزنەستى قولداۋ باعدارلامالارىنا ءتيىستى وزگەرىستەر ەنگىزۋ جانە مەملەكەتتىك قولداۋدىڭ قارجىلىق ەمەس شارالارىن الىپ تاستاۋ مۇمكىندىگىن قاراستىرۋدى ۇسىندى. ويتكەنى ولاردىڭ تيىمدىلىگى كۇمان تۋدىراتىنى بەلگىلى بولدى.
