قازاقستاندا الەۋمەتتىك جەلىلەردىڭ بۇعاتتالۋى مۇمكىن بە

نۇر- سۇلتان. قازاقپارات - قازاقستاندىقتار ءۇشىن الەۋمەتتىك جەلىلەردى بۇعاتتاۋ قاۋپى بار ما؟ اتالعان ماسەلەگە قاتىستى ق ر پارلامەنتى ءماجىلىسىنىڭ دەپۋتاتى ايدوس سارىم ءوز ويىن ءبىلدىردى، دەپ حابارلايدى قازاقپارات ءتىلشىسى.

«قازاقستاندا الەۋمەتتىك جەلى دەگەن جاقسى ءبىر قۇرال. ءبىراز ادامدار الەۋمەتتىك جەلى ارقىلى ءناپاقا تاۋىپ وتىر. كەيبىر ادامدار سول ارقىلى ءوزىن تانىمال ەتىپ جاتىر، ال بىرەۋلەر ول ەرمەك. ءبىر عانا Instagram-نىڭ وزىندە 8 ميلليون ادام وتىر. ەلدە اۋقىمدى رەفورمالار ءجۇرىپ، تاڭداۋ ءجۇرىپ جاتقان كەزدە ەشبىر ەسى دۇرىس ساياساتكەر الەۋمەتتىك جەلىنى بۇعاتتاۋعا بارمايدى. ونى بۇعاتتاۋعا جول بەرمەيدى»، - دەدى ايدوس سارىم ەلىمىزگە تانىمال جۋرناليست بۇبىگۇل جەكسەنبايعا بەرگەن سۇحباتىندا.

ونىڭ ايتۋىنشا، ەل ۇكىمەتىنىڭ الەۋمەتتىك جەلىدەگى دۇنيەنى جەكە دارا الىپ تاستايتىن ەش مۇمكىندىگى جوق.

«ول مۇمكىندىك كومپانيا يەلەرىنە تيەسىلى. ءار الەۋمەتتىك جەلىنىڭ ءوز تالابى مەن زاڭى بار. ءبىزدىڭ ۇكىمەت نەمەسە سوت سول الەۋمەتتىك جەلى تالابىنا كەرەعار كونتەنت تۋرالى ەسكەرتە الادى. ەلىمىزدە سوڭعى بولىپ جاتقان وقيعالار ءداستۇرلى مەدياعا دەگەن سۇرانىستى ارتتىراتىن سياقتى. Facebook, Instagram-نىڭ دا ۋاقىتى وتەدى. مىسالى، قازىر ەلدىڭ ءبىرازى Tik-Tok-قا ىعىسىپ جاتىر. بۇل باسەكەلەستىك ورتا، ءالى تالاي جاڭا دۇنيە شىعار»، - دەيدى ول. بۇعان دەيىن حالىق قالاۋلىسى كيبەربۋللينگ ماسەلەسى تۋرالى ويىن ورتاعا سالعان ەدى.