ماڭدايداعى اجىمدەرمەن كۇرەسۋ جولدارى

نۇر-سۇلتان. قازاقپارات - ماڭدايداعى ميميكالىق اجىمدەر كوپشىلىك ايەلدە بار. ولاردىڭ پايدا بولۋىنا جاسقا بايلانىستى تەرى وزگەرىستەرى، كۇيزەلىس، ىلعالدىڭ جەتىسپەۋى، تەمەكى تارتۋ جانە باقىلاۋسىز ميميكا سەبەپ بولادى.

ۋاقىت وتە ۇساق اجىمدەر تەرەڭ اجىمدەرگە اينالىپ، بەتكە شارشاڭقى جانە تۇنجىراعان ءتۇر بەرەدى. ماڭدايداعى اجىمدەردىڭ الدىن الۋ جانە كۇرەسۋ جولدارىن ۇسىنامىز.

ءومىر ءسۇرۋ سالتىڭىزدى تۇزەڭىز

ماڭدايىڭىزعا اجىمدەر ەرتە پايدا بولعانىن قالاماساڭىز، ءومىر ءسۇرۋ سالتىڭىزدى وزگەرتۋدى قولعا الىڭىز. ۇنەمى كۇيزەلىستىك جانە مازاسىز كۇيدە ءجۇرۋ ەموتسيالىق دەنساۋلىققا جاعىمسىز اسەر ەتىپ قانا قويماي، تەرى ساپاسىن دا ايتارلىقتاي ناشارلاتادى.

ۇيلەسىمسىز راتسيون دا ماڭدايعا ميميكالىق اجىمدەردىڭ پايدا بولۋىنىڭ سەبەبى بولا الادى. ولاردىڭ پايدا بولۋىنىڭ الدىن الۋ ءۇشىن نەمەسە ولاردىڭ سانىن ازايتۋ ءۇشىن كوبىرەك دۇرىس تاعامدار جەپ، كۇيزەلىسپەن كۇرەسۋدى ۇيرەنۋ كەرەك.

قاباق تۇيمەۋگە تىرىسىڭىز

بەلسەندى ميميكا، قاباق ءتۇيۋ ادەتى، بۇرتيۋ جانە قاستاردى جوعارى كوتەرۋ ماڭدايدا كولدەنەڭ اجىمدەردىڭ پايدا بولۋىنا ىقپال ەتەدى. سەبەبى ۋاقىت وتە بۇلشىقەتتەر مەن تىندەر قىرتىستاردىڭ كۇيىن جاتتاپ قالادى، ءدال سول جەرلەردە العاشقى ميميكالىق ىزدەر پايدا بولادى، سودان سوڭ ولار تۇراقتى تەرەڭ اجىمدەرگە اينالادى.

ءوز ميميكاڭىزدى باقىلاۋدا ۇستاۋ ءۇشىن ەموتسيالىق جاعدايىڭىزدى رەتكە كەلتىرىپ، بەتىڭىز بوساڭسىعان كۇيدە قالاتىن ينتوناتسيالار مەن قيمىلداردى قولدانۋعا تىرىسۋىڭىز قاجەت.

بەتكە ارنالعان گيالۋرون قىشقىلى بار كرەمدەر قولدانىڭىز

گيالۋرون قىشقىلى تەرىنى ءتيىمدى ىلعالداندىرعىشتاردىڭ ءبىرى سانالادى جانە كوپتەگەن كوسمەتيكالىق قۇرالداردىڭ قۇرامىنا كىرەدى. گيالۋرون قىشقىلىن سىرتقى پايدالانۋ بۇلشىقەتتەردىڭ جيىرىلۋ مولشەرىنە اسەر ەتپەگەنمەن، ول سوندا دا تەرى جاعدايىن ايتارلىقتاي جاقسارتادى جانە ميميكالىق اجىمدەردىڭ پايدا بولۋ ءساتىن بارىنشا سوزا الادى. وعان قوسا، گيلۋرون قىشقىلى تەرىنى ىلعالمەن قانىقتىرىپ، وعان ساۋ ءتۇر سىيلايدى.

بەت ماسساجىن ۇيرەنىڭىز

بەت ماسساجى — ماڭدايداعى ميميكالىق اجىمدەرمەن كۇرەسەتىن قاراپايىم ادىستەردىڭ ءبىرى. بۇل پروتسەدۋرا ليمفانى تاراتۋعا، اجىمدەردى تەگىستەۋگە كومەكتەسەدى جانە بەتتى جارقىراتادى. بەت ماسساجىن قالاي جاساۋ كەرەگىن زەرتتەپ، كۇندە جاساي بەرسەڭىز، قولىڭىز ۇيرەنىپ كەتەدى.

كوسمەتيكالىق پروتسەدۋرالارعا جۇگىنىڭىز

قازىر ماڭدايداعى اجىمدەردى تەگىستەۋگە باعىتتالعان كوسمەتيكالىق پروتسەدۋرالاردىڭ ءتۇر-ءتۇرى بار. مىسالى: ءجىپتى ليفتينگ، مەزوتەراپيا، بوتۋلينوتەراپيا. كوسمەتيكالىق پروتسەدۋرا جاساۋدى شەشسەڭىز، ناقتى پروتسەدۋرا جايلى ءبىراز زەرتتەپ، كاسىبي مامان تابۋ ماڭىزدى.

ارنايى لەنتالاردى قولدانۋدى ۇيرەنىڭىز (تەيپيروۆانيە)

بۇل اجىمدەردى ارنايى سوزىلمالى جولاقتاردى تەرىگە قويۋ ارقىلى تەگىستەيتىن ءادىس. ارنايى لەنتالاردى بۇلشىقەتتەر سىزىقتارى بويىنشا ورنالاستىرۋ قاجەت. مۇنداي لەنتالار ليمفا قايتۋىن جاقسارتادى، ءىسىنۋدى باسادى جانە تابيعي تۇردە بەت سوپاعىن تۇزەۋگە كومەكتەسەدى.

ەتبەتىمەن جاتىپ ۇيىقتاماڭىز

بەتتى جاستىققا قويىپ ۇيىقتاۋ ادەتى ماڭدايعا اجىمدەردىڭ پايدا بولۋىنا ىقپال ەتەدى. سەبەبى بۇل قالىپتا تەرىنى قانمەن قامتاماسىز ەتۋ پروتسەسى بۇزىلادى. بۇل تىندەردىڭ وزگەرۋىنە جانە ماڭدايدا اجىمدەردىڭ ەرتە پايدا بولۋىنا اكەلەدى. سوندىقتان ءبىر قىرمەن نەمەسە شالقاسىنان جاتىپ ۇيىقتاۋعا تىرىسىڭىز. ۇيقىنىڭ ساپالى ءارى تولىققاندى بولۋىن قاداعالاڭىز. سوزىلمالى ۇيقىسىزدىق تا تەرى جاعدايىن ناشارلاتىپ جىبەرەدى.

massaget.kz