ناتاليا گودۋنوۆا: اۋىلدى قويىپ، استانانىڭ وزىندە ينتەرنەت جەتپەي جاتقان جەرلەر بار

نۇر-سۇلتان. قازاقپارات - رەسپۋبليكالىق بيۋجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتوراعاسى ناتاليا گودۋنوۆا «قازاق تەلەكوم» كومپانياسىنا جۇرگىزىلگەن مەملەكەتتىك اۋديت تۋرالى مالىمەت بەردى، دەپ حابارلايدى قازاقپارات ءتىلشىسى.

«كۆازيمەملەكەتتىك سەكتورعا تەكسەرۋ جۇرگىزگەن كەزدە «قازاق تەلەكومعا» مەملەكەتتىك اۋديت جاسالدى. بۇل جەردە ءبىز ەكى ستراتەگيالىق پروبلەما كورىپ وتىرمىز. اۋىلداردىڭ كوبىندە ينتەرنەت جوق. سالدارىنان رەسپۋبليكا اۋماعىندا بالالاردىڭ ءبارى بىردەي دەڭگەيدە ءبىلىم الۋىن قامتاماسىز ەتە المايمىز. ەكىنشىدەن، ينتەرنەت جوق جەردەگى حالىققا وبلىس ورتالىقتارىنىڭ تۇرعىندارى ەمىن-ەركىن الاتىن مەملەكەتتىك قىزمەتتەردى كورسەتە المايمىز. ءارى كەتسە اۋدان ورتالىقتارىندا، كوممۋنيكاتسيالارعا جاقىن ورنالاسقان كەنتتەردە عانا ونداي مۇمكىندىك بار»، - دەدى ول «سيفرلىق قازاقستان» باعدارلاماسىنىڭ ارالىق ناتيجەسىن تالقىلاعان جيىندا.

سونداي-اق ول بايلانىس وپەراتورلارىنىڭ پايداكۇنەمدىگىنىڭ كەسىرىنەن استانانىڭ وزىندە ينتەرنەت جوق جەرلەر بار ەكەنىن ايتتى.

«ءتىپتى استانانىڭ وزىندە، الماتى اۋدانىندا، كەيبىر كەنتتەردە ينتەرنەت جوق. وپەراتورلار ول جەرلەرگە ينتەرنەت تارتۋدىڭ تابىسى از ەكەنىن ايتادى. ءبىراق وپەراتورلاردىڭ بۇدان باسقا تابىسى وتە جوعارى جوبالارى بار عوي. تابىستى سول جوبالاردىڭ ەسەبىنەن تولتىرۋعا بولادى. ينتەرنەتپەن جابدىقتاۋ كولەمى 100 پايىز بولۋى كەرەك. مينيستر دۇرىس ايتىپ وتىر. ونىڭ ۇستىنە «قازاق تەلەكومنىڭ» 51 پايىزىنا مەملەكەت يەلىك ەتەدى. قازىر ۇيالى تەلەفون ارقىلى مەملەكەتتىك قىزمەت الاتىن كەزگە جەتتىك. ال اۋىلداعىلار ءالى كۇنگە دەيىن مەكەنجاي انىقتاماسىن الۋ ءۇشىن 100 شاقىرىم جەردەگى اۋدان ورتالىعىنا بارىپ ءجۇر»، - دەدى ناتاليا گودۋنوۆا.