ۇشاقتا وتىرعاندا قورىقساڭىز

نۇر- سۇلتان. قازاقپارات - الەمدەگى ەڭ قاۋىپسىز ترانسپورتتاردىڭ الدىڭعى قاتارىنان ۇشاقتى كەزدەستىرۋگە بولادى. بۇلاي دەيتىنىمىز ۇشاقتان زارداپ شەگىپ، وپات بولاتىنداردىڭ سانى وزگە تاسىمالداۋشى قۇرالداردان ەداۋىر از.

الايدا، اۋەدە قالىقتاعان كولىك ىستەن شىققان جاعدايدا، جولاۋشىلاردىڭ امان قالۋى 100 دەن 1 پايىزدى عانا قۇرايدى. سوندىقتان كوپتەگەن ادام اتالعان كولىك قۇرالىنا وتىرار الدىندا ۇرەيگە بەرىلەتىنى انىق. سول سەبەپتى بۇگىن ءبىز نازارلارىڭىزعا اۋەجايدا قوبالجىعان مەزەتتە ءوزىڭىزدى سابىرعا شاقىرۋدىڭ بىرنەشە ءتاسىلىن ۇسىنامىز.

مۇنداي جاعدايدا ەڭ ءبىرىنشى ءوزىڭىزدى الداندىراتىن باسقا دۇنيەلەردى ويلاعانىڭىز ابزال. مىسالى، اۋەجاي ىشىندەگى دۇكەندەردى ارالاپ، ولارعا نازار اۋدارىپ، اينالاڭىزداعى كوڭىلدى جانداردى كوزىڭىزبەن ءبىر شالىپ وتسەڭىز بولادى. جامان ويدان اۋلاق بولىپ، جەتەتىن جەرىڭىزدە نە ىستەيمىن دەپ كوبىرەك ويلانىڭىز.

ەكىنشىدەن، قاسىڭىزدا وتىرعان اداممەن تانىسىپ، جاقسى اڭگىمەلەسۋگە قۇمارتىپ تۇرىڭىز. ءوزىڭىزدى جەڭۋ ءۇشىن «ۇشاقپەن ۇشقان قانداي، ءبىرىنشى رەت ۇشقاندا قورقىنىش بولدى ما؟» دەپ ديالوگ قۇرىپ وتىرىپ ءوزىڭىزدى سابىرعا شاقىرىڭىز. ەگەر ول ادامنىڭ قولى تيمەي نەمەسە سويلەسۋگە زاۋقى سوقپاسا، قايتا- قايتا مازاسىن الۋدىڭ قاجەتى جوق.

ۇشىنشىدەن، ۇشاق بورتىندا ءاربىر ادامعا بەرىلەتىن قۇلاققاپ بولادى. داۋىسىن شىعارىپ، كوڭىلدى دۇنيەلەردى تىڭداۋعا تىرىسىڭىز. ءوزىڭىزدىڭ ۇلكەن ارمانىڭىز ورىندالعانىن سەزىنىڭىز. سونداي- اق اۋەدە قالىقتاۋدان ءلاززات الا ءبىلىڭىز.

تورتىنشىدەن، قاتتى قوبالجىپ تۇرعاندا جاقىن ادامدارىڭىزعا قوڭىراۋ شالىپ، ءوزىڭىزدىڭ ۇشاققا وتىرعالى جاتقانىڭىزدى ايتىڭىز. «قانداي سىيلىق اكەلەيىن؟» دەپ قۋانتىپ قويساڭىز دا ارتىق بولماس.

بەسىنشىدەن، ۇشاق ىشىندەگى ءارتۇرلى وعاش دىبىستان قورقۋدىڭ قاجەتى جوق. تومەنگە قاراپ قۇلاساق نە بولار ەكەن دەگەن ويدان ارىلىڭىز. ونىڭ بارلىعى ءسىزدىڭ باسىڭىزداعى جاي عانا قورقىنىش. كوپتەگەن ادامنىڭ ايتۋى بويىنشا، ۇشاقتا وتىرىپ ءلاززات الۋ - وزگە ترانسپورتتاردىڭ ىشىندەگى ەڭ كەرەمەتى. اۋەدە قالقىپ، اق بۇلتتاردى كەسىپ وتكەندەگى سەزىمدى سوزبەن جەتكىزۋ مۇمكىن ەمەس.

Massaget.kz