قورعانىس مينيسترلىگىندە اسكەردى رەفورمالاۋ ماسەلەسى تالقىلاندى

نۇر-سۇلتان. قازاقپارات - قورعانىس ۆەدومستۆوسىندا قورعانىس ءمينيسترى گەنەرال- لەيتەنانت رۋسلان جاقسىلىقوۆتىڭ باسشىلىعىمەن ارداگەرلەر ۇيىمدارىنىڭ وكىلدەرى قاتىسقان كونفەرەنسيا ءوتتى، دەپ حابارلايدى ق ر ق م باسپا ءسوز قىزمەتى.

مەملەكەت باسشىسى قاسىم-جومارت توقايەۆتىڭ اسكەردى ودان ءارى دامىتۋ جونىندەگى تاپسىرمالارىن ىسكە اسىرۋ كونفەرەنسيانىڭ نەگىزگى تاقىرىبى بولدى. گەنەرال- لەيتەنانت رۋسلان جاقسىلىقوۆ بۇگىنگى تاڭدا ءبىرىنشى كەزەكتە بار كۇش-جىگەردى ارنايى وپەراتسيالار كۇشتەرىن، قۇرلىق اسكەرلەرىن، اۋە قورعانىسى كۇشتەرىن جانە اۋماقتىق قورعانىس جۇيەسىن دامىتۋعا باعىتتالعانىن ايتتى.

اسكەرلەردىڭ ۇتقىرلىعىن ارتتىرۋعا، زامان تالابىنا ساي قارۋ- جاراقپەن جانە اسكەري تەحنيكامەن جاراقتاندىرۋعا، جاۋىنگەرلىك دايارلىق، اسكەري باسقارۋ، ءبىلىم بەرۋ جانە كادر ساياساتى جۇيەسىن جەتىلدىرۋگە، وق- دارىلەردى ءقاۋىپسىز ساقتاۋدى قامتاماسىز ەتۋ جونىندەگى شارالارعا، سونداي- اق مەرزىمدى اسكەري قىزمەتتىڭ بەدەلىن ارتتىرۋعا ەرەكشە نازار اۋدارىلۋ ۇستىندە.

- قارۋلى كۇشتەردىڭ نەگىزگى دامۋ جولدارى ۇلتتىق قاۋىپسىزدىك ستراتەگياسى مەن اسكەردىڭ 2030 -جىلعا دەيىنگى قۇرىلىسى مەن دامۋ تۇجىرىمداماسىندا ەنگىزىلگەن. جوعارعى باس قولباسشى قارۋلى كۇشتەردى جەتىلدىرۋ، ولاردىڭ جاۋىنگەرلىك الەۋەتىن ارتتىرۋ مىندەتىن جۇكتەدى، - دەپ اتاپ ءوتتى مينيستر. - قىزمەتتى قايتا فورماتتاۋ بويىنشا ايتىلعان شارالاردى ىسكە اسىرۋ ولاردىڭ جاۋىنگەرلىك دايىندىعىن قولداۋدى جانە كەشەندى دامىتۋدى قامتاماسىز ەتەدى. اسكەري ۆەدومستۆو باسشىسى ارداگەرلەر ۇيىمدارى، ارداگەرلەردىڭ باي كاسىبي تاجىريبەسى ارميانى جاڭعىرتۋدا ۇلكەن قولداۋ كورسەتە الاتىنىنا سەنىم ءبىلدىردى.

«قارۋلى كۇشتەردىڭ ارداگەرلەرى» رەسپۋبليكالىق قوعامدىق بىرلەستىگى ورتالىق كەڭەسى ءتوراعاسىنىڭ ورىنباسارى وتستاۆكاداعى گەنەرال- مايور مارات نۇعىمانوۆ ارداگەرلەر ۇيىمدارىنىڭ الەۋەتىن پايدالانۋ اسكەرلەردى دايارلاۋ، ماتەريالدىق- تەحنيكالىق قامتاماسىز ەتۋ جانە جەكە قۇرامدى قازاقستان حالقىنا ادال بولۋعا تاربيەلەۋ مىندەتتەرىن شەشۋدە تابىسقا جەتۋدىڭ كەپىلى بولاتىنىن اتاپ ءوتتى. ارداگەرلەردىڭ وسكەلەڭ ۇرپاقپەن جۇمىس ىستەۋگە اتسالىسۋىنىڭ ماڭىزى زور.

مەملەكەت باسشىسىنىڭ تاپسىرماسىن ىسكە اسىرۋ اياسىندا قورعانىس مينيسترلىگى مەرزىمدى اسكەري قىزمەتتىڭ بەدەلىن ارتتىرۋ شارالارىن ازىرلەدى. بۇل رەتتە اۋقىمدى اسكەري- پاتريوتتىق جۇمىستار جۇرگىزىلۋ ۇستىندە. ارداگەرلەر ۇيىمدارىنىڭ قۇرامىندا قازاقستان ارمياسىن دامىتۋعا جاردەمدەسۋگە دايىن، قىزمەتتىك جانە جاۋىنگەرلىك تاجىريبەسى مول مىڭداعان بەلسەندى ازاماتتار بار.