اتىراۋ وبلىسىندا جىلقى قىرىلىپ جاتىر

اتىراۋ. قازاقپارات - اتىراۋ وبلىسىندا جىلقى قىرىلىپ جاتىر، دەپ حابارلايدى قازاقپارات.

وبلىستىق اۋىل شارۋاشىلىعى باسقارماسىنىڭ باسشىسى امانگەلدى سالاماتتىڭ ايتۋىنشا، يساتاي مەن قۇرمانعازى اۋدانىندا بىرنەشە جىلقىنىڭ نەدەن ولگەنى ازىرگە بەلگىسىز بولىپ وتىر.

«جىلقىنىڭ ءولۋ سەبەبىن انىقتاۋ ءۇشىن 25-ناۋرىزدا جەرگىلىكتى ۆەتەرينارلار سىناما الىپ، ۇلتتىق ۆەتەريناريالىق رەفەرەنتتىك ورتالىققا تاپسىردى. اتالعان ورتالىق ماماندارى ولگەن جىلقىدا ينفەكتسيالىق اسا جۇقپالى اۋرۋلار قاتارىنا جاتاتىن انەميا مەن رينوپنيەۆمونيانىڭ بەلگىسى بولماعانىن انىقتادى. ال، ۆەتەريناريا ماماندارى ولگەن جىلقىدان پارازيتتىك اۋرۋ بەلگىلەرىنە ۇقساس جاعدايدى بايقاعان. سوندىقتان، وبلىستىق ۆەتەريناريالىق زەرتحاناعا پارازيتتىك اۋرۋدى انىقتاۋ ءۇشىن سىناما تاپسىرىلدى. زەرتتەۋ ناتيجەسى قوسىمشا حابارلانادى»، - دەيدى امانگەلدى سالامات.

ونىڭ ايتۋىنشا، بىرنەشە تۇرعىننىڭ اۋىرعان مالىنا جەرگىلىكتى ۆەتەرينارلار ەمدەۋ جۇمىستارىن جۇرگىزىپ جاتىر. وبلىستىق اكىمدىكتىڭ شاقىرۋىمەن قازاق ۆەتەريناريالىق عىلىمي- زەرتتەۋ ينستيتۋتى مەن بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىنىڭ ماماندارى 31-ناۋرىز-2-ءساۋىر ارالىعىندا اتالعان اۋدانداردا سىناما الىپ، زەرتتەۋ جۇمىستارىن جۇرگىزەدى.