مەملەكەت باسشىسى ءتىل ءبىلىمى ينستيتۋتىنىڭ ديرەكتورىن قابىلدادى

نۇر-سۇلتان. قازاقپارات – مەملەكەت باسشىسى قاسىم- جومارت توقايەۆ ءتىل ءبىلىمى ينستيتۋتىنىڭ ديرەكتورى انار فازىلجانوۆانى قابىلدادى.

پرەزيدەنتكە احمەت بايتۇرسىن ۇلى اتىنداعى ءتىل ءبىلىمى ينستيتۋتى عالىمدارىنىڭ ءۇش باعىتتا جۇمىس اتقارىپ جاتقانى تۋرالى مالىمەت بەرىلدى.

انار فازىلجانوۆانىڭ ايتۋىنشا، ءبىرىنشى باعىت - الەمدىك لينگۆيستيكانىڭ ءبىر سالاسى رەتىندەگى قازاق ءتىلى عىلىمىنىڭ ىرگەلى تەوريالىق ماسەلەلەرىنە ارنالعان زەرتتەۋلەر. ەكىنشى باعىت - قازاق ءتىلىن تسيفرلاندىرۋ، اتاپ ايتقاندا، قازاق ءتىلىنىڭ ۇلتتىق كورپۋسى دەپ اتالاتىن ەلەكتروندى اقپاراتتىق رەسۋرس جاساعان. ءۇشىنشى باعىت - قازاق ءتىلىن رەفورمالاۋ. ونداعى ماقسات - عىلىم سالاسىنداعى قازاق ءتىلىنىڭ قولدانىسىن كەڭەيتۋ.

قاسىم- جومارت توقايەۆ ءتىل ءبىلىمى ينستيتۋتى عالىمدارىنىڭ ەڭبەكتەرىنە جوعارى باعا بەرىپ، جۇمىستارىنا تابىس تىلەدى.