وزبەكستان مەن تۇركيا اسكەري كەلىسىمگە قول قويدى

نۇر-سۇلتان. قازاقپارات - وزبەكستان مەن تۇركيا 29- ناۋرىزدا كەڭەيتىلگەن اسكەري كەلىسىمگە قول قويدى، دەپ حابارلايدى Bugin.kz پورتالى تۇركيا قورعانىس مينيسترلىگىنە سىلتەمە جاساپ.

بۇل قۇجاتقا تۇركيا پرەزيدەنتى رەجەپ تايىپ ەردوعاننىڭ وزبەكستانعا ساپارى بارىسىندا قول قويىلدى.

قۇجاتقا تۇرىك تاراپىنان - ۇلتتىق قورعانىس ءمينيسترى حۋلۋسي اكار، وزبەك جاعىنان - قورعانىس ءمينيسترى باحودىر كۋربانوۆ قول قويدى.

اتالمىش قۇجاتتىڭ ءمانى نەدە ەكەنىن قوس تاراپ تا اشىپ ايتپادى. دەگەنمەن تاشكەنتتە وتكەن بىرلەسكەن باسپا ءسوز ءماسليحاتىندا ەردوعان تۇركيا مەن وزبەكستان اراسىندا قورعانىس ونەركاسىبى سالاسىندا كەلىسىمدەرگە قول قويىلعانىن، بۇل ەلدەردىڭ «ۇلكەن الەۋەتى» بار ەكەنىن اتاپ ءوتتى.

سونىمەن قاتار وزبەكستان مەن تۇركيا ەكىجاقتى قارىم-قاتىناستى جاڭا دەڭگەيگە - جان-جاقتى ستراتەگيالىق سەرىكتەستىككە كوتەرۋ تۋرالى شەشىم قابىلدادى.