«امانات» پارتياسى: زەينەتاقىنىڭ ەڭ تومەنگى جەتكىلىكتى شەگىن پايدالانۋ مەرزىمىن ۇزارتۋ كەرەك
بۇل تۋرالى دەپۋتات ءوزىنىڭ Facebook جەلىسىندەگى رەسمي پاراقشاسىندا جازدى، دەپ حابارلايدى قازاقپارات.
«بۇل كۇندەرى بارلىعىمىز «وتباسى بانكتەگى» ۇزىن-سونار كەزەكتىڭ كۋاسى بولدىق. ءۇش كۇننەن كەيىن ولاردى پايدالانۋ ءۇشىن زەينەتاقى جيناقتارىنىڭ شەگى كوتەرىلەدى. تۇرعىندار تاعى دا دۇرلىگەدى. وتكەن جىلدىڭ جەلتوقسان ايىندا ەڭبەك جانە حالىقتى الەۋمەتتىك قورعاۋ مينيسترلىگى مەن ب ج ز ق زەينەتاقى جيناقتارىنىڭ بارىنشا از جەتكىلىكتىلىك شەگىن كوتەردى، بۇل ۇلكەن قوعامدىق رەزونانس تۋدىردى. ماسەلەنىڭ كۇردەلەنگەنى سونشالىق، وعان پرەزيدەنتتىڭ ارالاسۋىنا تۋرا كەلدى. ناتيجەسىندە ەڭ تومەنگى جەتكىلىكتىلىك شەگىن ارتتىرۋ 2022-جىلدىڭ 1- ساۋىرىنە دەيىن شەگەرىلدى»، - دەدى دەپۋتات.
امانجان جامالوۆ «امانات» پارتياسىنىڭ فراكسياسى جەتكىلىكتىلىكتىڭ ەڭ تومەنگى شەكتەرىن قايتا ەسەپتەۋ تۋرالى ۇسىنىسپەن دەپۋتاتتىق ساۋال جولداعانىن، ءبىراق رەسمي تۇردە جاۋاپ الىنعانىن اتاپ ءوتتى.
«وسىعان وراي «امانات» پارتياسىنىڭ فراكسياسى دەپۋتاتتىق ساۋال جولداعان، سايىپ كەلگەندە، ولاردىڭ ايتارلىقتاي تومەندەۋىنە اكەپ سوقتىراتىن ەڭ تومەنگى شەكتى ماندەردى قايتا ەسەپتەۋ ۇسىنىسى بار. ءبىراق، وكىنىشكە وراي، وتىنىشىمىزگە رەسمي جاۋاپ الدىق.
ەستەرىڭىزگە سالا كەتەيىن، زەينەتاقى جيناقتارىنىڭ ءبىر بولىگىن الۋ - مەملەكەت باسشىسىنىڭ يدەياسى بولدى. ول ۇلكەن قوعامدىق قولداۋعا يە بولدى. مىڭداعان ازاماتتار باسپانا ساتىپ الدى، يپوتەكالىق نەسيەسىن وتەدى، ەمدەلۋگە اقشا تولەدى - بۇل ناقتى الەۋمەتتىك ناتيجە.
جەتكىلىكتىلىك شەگىنىڭ 2 ەسە ءوسۋى ءىس جۇزىندە پرەزيدەنتتىڭ يدەياسىنا نۇقسان كەلتىرەدى.
1- ساۋىرگە دەيىن ساناۋلى كۇندەر قالدى، ءبىراق ەڭبەك مينيسترلىگى مەن ب ج ز ق تاعى دا ءۇنسىز. شەشىم، ءتۇسىندىرۋ جۇمىستارى مەن تالقىلاۋ جوق. مينيمالدى جەتكىلىكتىلىكتىڭ جاڭا شەگى تۇرعىندار ءۇشىن تاعى دا توسىنسىي بولماق جانە ولار «وتباسى بانكىنە» كەزەككە تۇرعان.
تەڭگە باعامىنىڭ ديەۆالۆاتسياسى مەن زەينەتاقى جيناقتارىنىڭ قۇنسىزدانۋى جاعدايىندا شەكتى دەڭگەيدىڭ جوعارىلاۋى ازاماتتاردىڭ تيتىعىنا ءتيىپ، تۇسىنبەۋشىلىگىن تۋدىرادى»، - دەپ جالعاستىردى ا. جامالوۆ.
امانجان جامالوۆ ۇكىمەتتى زەينەتاقى جيناقتارىنىڭ ەڭ تومەنگى جەتكىلىكتىلىگى شەگىنىڭ قولدانىلۋ مەرزىمىن 2022-جىلدىڭ سوڭىنا دەيىن ۇزارتۋعا شاقىردى.
