بۇكىل الەم ءسۇيىنشى جاڭالىق كۇتىپ وتىر - ەردوعان

None
None
نۇر- سۇلتان. قازاقپارات - بۇگىن تۇركيادا ۋكرايناداعى احۋالدى تۇراقتاندىرۋعا ارنالعان كەلىسسوزدەردىڭ كەزەكتى راۋندى ءوتتى، دەپ حابارلايدى «حابار 24».

تاراپتار جابىق فورماتتا كەزدەستى، ياعني بۇقارالىق اقپارات قۇرالدارىنىڭ قاتىسۋىنا تيىم سالىندى. دەگەنمەن الەمدىك باسىلىمدار وزدەرىنىڭ دەرەككوزدەرىنە سىلتەمە جاساي وتىرىپ، ءبىرقاتار مالىمدەمە جاسادى.

بۇگىن ستامبۇلدىڭ دولماباحچە سارايىندا انكارانىڭ اراعايىندىعىمەن ۋكراينا جانە رەسەي دەلەگاتسيالارىنىڭ كەلىسوزى ءوتتى. تاراپتار اقپارات قۇرالدارىنىڭ قاتىسۋىنسىز جابىق فورماتتا كەزدەستى. دەسە دە ەكى تاراپتىڭ رەسمي وكىلدەرى جاساعان مالىمدەمەگە سايكەس، جيىن ءبىرىنشى كەزەكتە ۋكراينا جەرىندەگى گۋمانيتارلىق داعدارىس پەن اتىستى توقتاتۋعا باعىتتالدى. الدىمەن تۇركياعا رەسەي پرەزيدەنتىنىڭ كەڭەسشىسى ۆلاديمير مەدينسكي باستاعان رەسەي دەلەگاتسياسى كەلدى. ءبىراز ۋاقىتتان كەيىن ۋكراينا دەلەگاتسياسى دا وقيعا ونىنا جەتتى. ونىڭ ىشىندە قورعانىس ءمينيسترى الەكسەي رەزنيكوۆ، پرەزيدەنت كەڭسەسى باسشىسىنىڭ كەڭەسشىسى ميحايلو پودولياك جانە «حالىق قىزمەتشىسى» پارتياسىنىڭ پارلامەنتتىك فراكسياسىنىڭ جەتەكشىسى داۆيد اراحاميا بولدى.

كەلىسسوز وتەتىن ورىنعا تۇركيا پرەزيدەنتى رەجەپ تايىپ ەردوعان دا كەلدى. كەلىسسوزدەر باستالماس بۇرىن ەردوعان قىسقاشا ءسوز سويلەپ، بۇل كەلىسسوزدەر رەسەي مەن ۋكراينا پرەزيدەنتتەرىنىڭ بەتپە- بەت كەزدەسۋىن وتكىزۋگە ىقپال ەتەتىنىنە ءۇمىت ءبىلدىردى جانە مۇنداي كەزدەسۋدى تۇركيا اۋماعىندا وتكىزۋگە دايىن ەكەنىن جەتكىزدى.

رەجەپ تايىپ ەردوعان، تۇركيا پرەزيدەنتى:

- وپات بولعان ءاربىر ادام، قيراعان عيمارات، تۇراقتىلىق جولىندا جۇمسالۋى ءتيىس بايلىق - ورتاق بولاشاعىمىزدان جۇلىپ الىنعان قۇندىلىق. بۇل تراگەديانى توقتاتۋ تاراپتاردىڭ قولىندا. اتىس- شابىستى توقتاتۋعا بارلىق تاراپ مۇددەلى. كەلىسسوزدەردىڭ ناقتى ناتيجەسىن كورەتىن كەز كەلدى. تاپ قازىر ءاربىر دەلەگاتسيا مۇشەسىنە تاريحي جاۋاپكەرشىلىك جۇكتەلگەن. بۇكىل الەم ءسۇيىنشى جاڭالىق كۇتىپ وتىر.


سوڭعى جاڭالىقتار