ترانسشەكارالىق وزەندەر سۋى ازايىپ بارادى - ەكولوگيا مينيسترلىگى

None
None
نۇر- سۇلتان. قازاقپارات - سوڭعى 2-3 جىلدا ترانسشەكارالىق وزەندەر سۋىنىڭ ازايۋى بايقالادى. بۇل تۋرالى «حابار 24» تەلەارناسىنىڭ «كۇن ءتارتىبى» باعدارلاماسىندا ق ر ەكولوگيا، گەولوگيا جانە تابيعي رەسۋرستار مينيسترلىگى ترانسشەكارالىق وزەندەر دەپارتامەنتىنىڭ ديرەكتورى ارسەن جاقانبايەۆ ايتتى، دەپ حابارلايدى قازاقپارات ءتىلشىسى.

«ترانسشەكارالىق وزەندەرمەن سۋدىڭ از اعىپ كەلۋىن سوڭعى 2-3 جىلدا بايقاپ وتىرمىز. ەڭ الدىمەن بۇل - تابيعي قۇبىلىس. قازىرگى ۋاقىتتا الەمدەگى پروبلەما كليماتتىڭ وزگەرۋى بولىپ تۇر. ياعني، كۇن جىلىنىپ قۇرعاقشىلىق ورىن الۋدا. ەكىنشىدەن، ءار مەملەكەتتىڭ تۇرعىلىقتى تۇرعىندارىنىڭ دامۋى، ءوسۋى بار. سوعان وراي سۋدى تۇتىنۋ كولەمى ارتىپ كەلەدى»، - دەدى ول.

وسى رەتتە ول رەسەيدەن كەلەتىن جايىق وزەنى سۋىنىڭ سوڭعى 2-3 جىلدا ازايىپ كەتۋى ەلىمىزدىڭ باتىس وڭىرىنە زاردابىن تيگىزىپ وتىرعانىن ايتتى.

«رەسەي تاراپىمەن بىرنەشە كەلىسسوز جۇرگىزگەن ەدىك. ولار سۋدى ەڭ الدىمەن ءوز قاجەتىنە پايدالانادى. ءبىز سۋدىڭ تومەنگى ساعاسىندا وتىرعاندىقتان ولار پايدالانعاننان قالعان سۋدى قولدانامىز. جالپى، ءار مەملەكەتپەن ترانسشەكارالىق وزەندى پايدالانۋعا قاتىستى كەلىسىم بار. ماسەلەن، رەسەيمەن 2013 -جىلى بەكىتىلگەن كەلىسىم بار. سول كەلىسىمنىڭ اياسىندا ءار وزەن بويىنشا 6 جۇمىس توبى قۇرىلعان. ايتالىق، جايىق پەن توبىل وزەنى 1996 -جىلعى حاتتامامەن رەتتەلەدى. سول قۇجاتقا سايكەس سۋ از، ورتاشا جانە كوپ جىلدارى وزىمىزگە كەرەكتى سۋ مولشەرىن الامىز. ءبىراق، جايىق وزەنىنىڭ وزىندىك سيپاتتاماسى بار. جايىقتىڭ سۋ از سيكلى وتە ۇزاق بولادى. ول 5-6 جىلعا سوزىلۋى مۇمكىن. سونىڭ سالدارى ءبىزدىڭ ەكولوگيامىزعا تيەدى»، - دەدى ارسەن جاقانبايەۆ.

اۆتور: مارلان جيەمباي

سوڭعى جاڭالىقتار