قازاقستانعا تاۋار اكەلۋدە گەوساياسي جاعداي قالاي اسەر ەتىپ جاتىر

نۇر- سۇلتان. قازاقپارات - ەلىمىزگە سىرتتان تاۋار جەتكىزۋدە قازىرگى گەوساياسي جاعدايدىڭ اسەرى قانداي؟ بۇل ماسەلەگە قاتىستى ق ر ساۋدا جانە ينتەگراتسيا مينيسترلىگىنىڭ تەحنيكالىق رەتتەۋ جانە مەترولوگيا كوميتەتى ءتوراعاسىنىڭ ورىنباسارى قۋانىش ەلىكبايەۆ تۇسىنىك بەردى، دەپ حابارلايدى قازاقپارات ءتىلشىسى.

«گەوساياسي جاعدايعا بايلانىستى تاۋار تاسىمالداۋ مەن جەتكىزۋدە وزگەرىس بولىپ جاتىر. ياعني، سىرتتان كەلەتىن تاۋارلاردىڭ تۇپكىلىكتى قۇنى، كولەمى جانە جەتكىزۋ بويىنشا وزگەرىستەر بايقالىپ وتىر. بۇگىندە كورشى ەلدەردە تۇتىنۋ تاۋارلارى، حيميالىق زاتتار مەن جابدىقتار جەتىسپەۋشىلىگى بار. سوندىقتان كاسىپكەرلەر مارشرۋتتاردىڭ وزگەرەتىنىن ايتىپ جاتىر. كاسىپكەرلەر بۇعان دەيىن تاۋارلاردى رەسەيدەن ساتىپ السا، ەندىگى ۋاقىتتا باتىس جانە باسقا دا ەلدەردەن اكەلۋگە ءماجبۇر»، - دەدى قۋانىش ەلىكبايەۆ ب ا ق وكىلدەرىمەن وتكەن باسپا ءسوز ءماسليحاتىندا.

سونداي- اق، كوميتەت باسشىسىنىڭ ورىنباسارى لوگيستيكا بويىنشا دا سوڭعى ۋاقىتتا جاعدايدىڭ وزگەرگەنىن تىلگە تيەك ەتتى. بۇعان دەيىن قىرعىزستاننان تۇرمىستىق ەلەكتر قۇرالدارىن زاڭسىز اكەلگەندەرگە 1,8 ميلليون تەڭگە ايىپپۇل سالىنعانى ايتىلدى . ودان بولەك، قازاقستانعا سىرتتان كەلەتىن تاۋارلارعا باقىلاۋدىڭ قالاي جۇرەتىنى ءتۇسىندىرىلدى.

اۆتور: ءالي يبرايەۆ