رەسەي مەن بەلارۋسقا ەكسپورتتاۋعا تىيىم سالىنعان تاۋارلاردىڭ نۇسقاۋلىعى شىقتى

None
None
نۇر- سۇلتان. قازاقپارات - رەسەي مەن بەلارۋسقا ەسكپورتتاۋعا جانە يمپورتتاۋعا تىيىم سالىنعان تاۋارلاردىڭ نۇسقاۋلىعى شىقتى.

بۇل تۋرالى ءوزىنىڭ Facebook پاراقشاسىندا ق ر ساۋدا جانە ينتەگراتسيا ءمينيسترى باقىت سۇلتانوۆ جازدى، دەپ حابارلايدى قازاقپارات.

ونىڭ جازۋىنشا، رەسەي مەن بەلارۋسقا ءبىرقاتار ەلدىڭ سانكسيا ەنگىزۋىنەن كەيىن كاسىپكەرلەر كوپتەگەن ماسەلەلەرگە تاپ بولىپ وتىر. ماسەلەن، بەلگىلى ءبىر ءونىم نەمەسە بانككە سانكسيا ەنگىزىلۋى مۇمكىن دەگەن سياقتى ت. ب. بۇل ماسەلە تەك وسى ەلدەرگە قازاقستاندىق ونىمدەردى ەكسپورتتاۋدا عانا ەمەس، جالپى وزەكتى بولىپ وتىر.

«ءبىز بۇكىل الەممەن ەركىن ساۋدا جاسايمىز، ال ءبىرىڭعاي كەدەندىك ايماق جاعدايىندا تاۋارلار اعىنى بارىنشا جەڭىلدەتىلگەن. سونداي- اق، قازاقستان ارقىلى رەسەي مەن بەلارۋس ەلدەرىنە باعىتتالعان تاۋارلار كوپتەپ كەلەدى. ەندىگى مىندەتىمىز - رەەكسپورت قاۋپىنە بايلانىستى سانكسيا سالعان ەلدەردىڭ «ەرەكشە نازارىنا» ءتۇسىپ قالماۋ. سوندىقتان، كاسىپكەرلەرگە ىڭعايلى بولۋ ءۇشىن پرەمەر- ءمينيستردىڭ توراعالىعىمەن جەدەل شتاب بيزنەسكە ارنالعان «نۇسقاۋلىقتى» قۇرۋ تۋرالى شەشىم قابىلدادى: مەملەكەتتىك ورگانداردىڭ رەسمي سايتتارىنان ءبىر سايتتا - http://sanction2022.kz/main - رەسەي فەدەراتسياسى مەن بەلارۋس رەسپۋبليكاسىنا ەكسپورتتاۋعا جانە يمپورتتاۋعا تىيىم سالىنعان تاۋارلاردىڭ تولىق ءتىزىمىن جينادىق»، - دەيدى مينيستر.

ونىڭ ايتۋىنشا، جاڭا دەرەكتەر پايدا بولعان كەزدە اقپارات جاڭارتىلىپ وتىرادى. سونىمەن قاتار سايتتا ەلدەردەگى گەوساياسي تاۋەكەلدەردىڭ جوعارى ەكەنىن ەسكەرە وتىرىپ، نارىعىنان كەتۋگە شەشىم قابىلداعان حالىقارالىق كومپانيالاردىڭ ءتىزىمى جاريالانعان. بۇل كومپانيالاردى قازاقستانعا تارتۋ تۋرالى ماسەلەگە كەلسەك، قازاقستان پوستكەڭەستىك كەڭىستىكتەگى بيزنەس اشۋ جانە ونى جۇرگىزۋگە ەڭ قولايلى ايماقتاردىڭ ءبىرى بولىپ تابىلادى.

«بۇل ءوز كەزەگىندە ناقتى سەكتوردا ينۆەستيتسيالاردىڭ وسۋىنە جانە جاڭا وندىرىستەردىڭ اشىلۋىنا ىقپال ەتەدى. ال بۇل مەملەكەت باسشىسىنىڭ ۇكىمەت الدىنا قويعان نەگىزگى مىندەتتەرىنىڭ ءبىرى. سوندىقتان قازاقستاندا ءوز ءوندىرىسىن اشقىسى كەلەتىن كەز كەلگەن كومپانيا ينۆەستورلار ءۇشىن قولجەتىمدى جەڭىلدىكتەردىڭ تولىق سپەكترىن پايدالانا الادى»، - دەلىنگەن باقىت سۇلتانوۆتىڭ جازباسىندا.

سوڭعى جاڭالىقتار