حالىقارالىق وليمپيادادا جەڭگەن بالالارعا قانداي قوسىمشا مۇمكىندىكتەر بەرىلەتىنى بەلگىلى بولدى

None
None
نۇر- سۇلتان. قازاقپارات - ق ر ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا حالىقارالىق وليمپيادالاردىڭ جەڭىمپازدارىنا قانداي قوسىمشا مۇمكىندىكتەر جاسالاتىنىن ايتتى، دەپ حابارلايدى قازاقپارات ءتىلشىسى.

«مەكتەپتەگى ءبىلىم بەرۋدىڭ ساپاسى مەن تيىمدىلىگىن سيپاتتايتىن نەگىزگى پارامەترلەردىڭ ءبىرى - دارىندى بالالاردى انىقتاۋ، دامىتۋ جانە ولاردى رەسپۋبليكالىق، حالىقارالىق وليمپيادالار مەن عىلىمي جارىستارعا قاتىستىرۋ. 2020-2021 وقۋ جىلىندا قازاقستاندىق 26 وقۋشى جەتى بەدەلدى حالىقارالىق ءپان وليمپيادالارىنىڭ جەڭىمپازدارى مەن جۇلدەگەرلەرى اتاندى. 2021 -جىلعى 1 - قىركۇيەكتەگى قازاقستان حالقىنا جولداۋىندا پرەزيدەنت وسىنداي دارىندى بالالاردى، سونداي- اق ولاردىڭ ۇستازدارىن جان- جاقتى قولداۋ مىندەتىن قويدى. حالىقارالىق وليمپيادالاردىڭ جەڭىمپازدارى مەن جۇلدەگەرلەرىن، ولاردىڭ پەداگوگتەرىن كوتەرمەلەۋ ولاردى حالىقارالىق دەڭگەيدە جوعارى ناتيجەلەرگە قول جەتكىزۋگە ىنتالاندىرۋ تەتىگى بولىپ وتىر. بۇل جالپى العاندا ەلدىڭ ءبىلىم سالاسى مەن ادامي كاپيتالىنىڭ دامۋىنا وڭ اسەر ەتەدى. سونىمەن قاتار، مۇنداي ىنتالاندىرۋ مەحانيزمى ءتيىستى نورماتيۆتىك قۇقىقتىق اكتىلەرمەن رەتتەلۋى جانە جۇيەلەنۋى كەرەك، ياعني ىنتالاندىرۋ قاراستىرىلاتىن ناقتى وليمپيادالاردىڭ ءتىزىمى بەكىتىلۋى ءتيىس»، - دەدى گ. كارىموۆا ورتالىق كوممۋنيكاتسيالار قىزمەتىندە.

وسى ورايدا جولداۋدى ىسكە اسىرۋ جونىندەگى جالپى ۇلتتىق ءىس- شارالار جوسپارىن ورىنداۋ ماقساتىندا جەڭىمپازدار مەن جۇلدەگەرلەردى جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنا كونكۋرستان تىس قابىلداۋ، جۇلدەگەرلەرگە جانە ولاردى دايىنداعان پەداگوگتەرگە ءبىرجولعى اقشالاي سىيلىق بەرۋ جوسپارلانىپ وتىر. سونداي- اق، جوعارى وقۋ ورىندارىنا كونكۋرستان تىس قابىلداۋ ءۇشىن وليمپيادانىڭ ءپانى كادرلاردى دايىنداۋ باعىتىنا سايكەس كەلگەن جاعدايدا، ءبىلىم گرانتارىن تاعايىنداۋ جۇزەگە اسىرىلادى.

جىل سايىن شامامەن 50 جەڭىمپازعا گرانتتار بولىنەدى. مىسالى، 2021 -جىلى قازاقستاندىق وقۋشىلار حالىقارالىق وليمپيادالاردان 26 مەدال الدى (2020 -جىلى - 16). سونىمەن بىرگە، سوڭعى ءۇش جىلدا جەڭىمپاز اتانعان دارىندى بالالارعا ءبىلىم بەرۋ گرانتىن تاعايىنداۋ ءۇشىن وليمپيادالار مەن جارىستار تىزبەسىنە ىرىكتەۋ كريتەرييلەرى ازىرلەنۋدە.

«سونىمەن قاتار، حالىقارالىق وليمپيادالاردىڭ التىن مەدال يەگەرىنە - 1500 ايلىق ەسەپتىك كورسەتكىش، كۇمىس مەدال - 1000 اەك، قولا مەدال يەگەرىنە 500 اەك مولشەرىندە ءبىرجولعى سىياقى تولەۋ رەسپۋبليكالىق بيۋدجەت قاراجاتى ەسەبىنەن جوسپارلانۋدا. سونداي- اق، ولاردى دايىنداعان پەداگوگتەرگە ءبىرجولعى سىياقى تولەمدەرى مىناداي مولشەردە بەلگىلەنەدى: التىن مەدال يەگەرىن دايىنداعان پەداگوگكە - 150 اەك، كۇمىس مەدال - 100 اەك، قولا مەدال - 50 اەك»، - دەدى كوميتەت باسشىسى.

اۆتور: رۋسلان عابباسوۆ

سوڭعى جاڭالىقتار