سارىاعاشتا «حالىقارالىق اسىل تۇقىمدى قويلار» كورمەسى ءوتتى

تۇركىستان. قازاقپارات - تۇركىستان وبلىسىنىڭ سارىاعاش اۋدانىندا اسىل تۇقىمدى قويلار كورمەسى ءوتتى، دەپ حابارلايدى قازاقپارات ءتىلشىسى.

ق ر اۋىل شارۋاشىلىعى مينيسترلىگىنىڭ ۇيىمداستىرۋىمەن تۇركىستان وبلىسىنىڭ سارىاعاش اۋدانىندا «ەتتى- ماي باعىتىنداعى حالىقارالىق اسىل تۇقىمدى قويلار» كورمەسى ءوتتى.

كورمەگە رەسەي، مولدوۆا، وزبەكستان، تاجىكستان، قىرعىزستان ەلدەرىنەن كەلگەن 100-دەن اسا قوي ءوسىرۋشى ازاماتتار جانە ەلىمىزدىڭ 8 وبلىسىنان كەلگەن شارۋالار قاتىستى.

شارا شەڭبەرىندە ەتتى- مايلى قوي تۇقىمىنىڭ «ەڭ اۋىر سالماقتى»، «ەڭ بيىگى» اتالىمدارى بويىنشا بايقاۋلار ۇيىمداستىرىلدى. ناتيجەسىندە 45 نوميناتسيانىڭ جەڭىمپازدارى انىقتالدى.

سونىمەن قاتار، ق ر اۋىل شارۋاشىلىعى مينيسترلىگىنىڭ مال شارۋاشىلىعى دەپارتامەنتىنىڭ باسشىسى ەرلان ءىلياسوۆ ۇزدىك شارۋالاردى «اۋىل شارۋاشىلىعى ۇزدىگى»، «ۇزدىك قوي ءوسىرۋشى شارۋاشىلىق» جانە «ۇزدىك اسىلداندىرۋشى» توسبەلگىلەرىمەن ماراپاتتادى.