شەتەلدىڭ تانىمال سۋرەتشىلەرى تۇركىستانداعى ناۋرىزدى بەينەلەدى

تۇركىستان. قازاقپارات - شەتەلدىڭ تانىمال سۋرەتشىلەرى تۇركىستانداعى ناۋرىزدى بەينەلەدى، دەپ حابارلايدى قازاقپارات ءتىلشىسى.

تۇركىستان قالاسىندا «Nauriz in Turkistan» حالىقارالىق سۋرەتشىلەرى فورۋمى قورىتىندىلاندى.

شەتەلدەن ارنايى كەلگەن قىلقالام شەبەرلەرىنىڭ جۇمىسى «Farab» كىتاپحاناسىنىڭ فوەسىنە قويىلدى.

وندا كەسەنەنىڭ كەلبەتى، ناۋرىز ناقىشتارى، تۇركىستان كوشەلەرى مەن تابيعاتى كەڭ كولەمدە كورسەتىلگەن.

سالتاناتتى شارادا تۇركىستان قالاسى اكىمىنىڭ ورىنباسارى ءاليا شالقاروۆا ءىس-شارانىڭ جوعارى دەڭگەيدە وتكەندىگىن جەتكىزىپ، ۇيىمداستىرۋشىلار مەن قاتىسۋشىلارعا العىس ايتتى.

قازاقستان رەسپۋبليكاسى سۋرەتشىلەر وداعىنىڭ ءتوراعاسى ومىربەك جۇبانيازوۆ الەمدىك سۋرەت ونەرىنىڭ يەلەرى ەكى اپتا بويى تاجىريبە الماسىپ، شەبەرلىكتەرىن شىڭداعاندارىن ايتتى.

شەتەلدىك قىلقالام شەبەرلەرى دە وزدەرىنىڭ وي پىكىرلەرىن ورتاعا سالىپ، العان اسەرلەرى تۋرالى باياندادى.

ماسەلەن، ا ق ش- تان كەلگەن يرين پورياگينا كورمەگە 4 تۋىندىسىن ۇسىنعان. سونىڭ ىشىندە ناۋرىزعا قاتىستى سالعان سۋرەتى وزىنە ەرەكشە اسەر بەرىپتى.

ال، وزبەكستاننان كەلگەن ديلورام مامەدوۆا تۇركىستان تۋرالى 2 سۋرەت سالعان. سۋرەتشىنى تۇركىستاندىقتاردىڭ قوناقجايلىلىعى، تاماشا تابيعاتى ءتانتتى ەتىپتى.

كورمەگە جينالعان كوپشىلىك ا ق ش، ارمەنيا، پولشا، تۇركيا، بۋرياتيا، رەسەي، وزبەكستان ەلدەرىنەن كەلگەن جيىرمادان اسا سۋرەتشىنىڭ تۇركىستان تۋرالى سالعان سۋرەتتەرىن تاماشالادى.

كورمەدە قوناقتار مەن ءىس-شارانى ۇيىمداستىرۋشىلارعا كادەسىيلار مەن ارنايى العىسحاتتار تابىس ەتىلدى.

ايتا كەتەيىك، وسىدان ەكى اپتا بۇرىن تۇركىستاندا «Nauriz in Turkistan» حالىقارالىق سۋرەتشىلەرى فورۋمى باستالعان بولاتىن.