پاندەميا ءالى اياقتالعان جوق – د د ۇ ە ا ب باسشىسى

الماتى. قازاقپارات - پاندەميا ءالى اياقتالعان جوق. بۇل تۋرالى قازاقستانعا ءىس ساپارى بارىسىندا دۇنيەجۇزىلىك دەنساۋلىق ساقتاۋ ۇيىمىنىڭ ەۋروپالىق ايماقتىق بيۋروسىنىڭ باسشىسى حانس كليۋگە ءمالىم ەتتى، دەپ حابارلايدى قازاقپارات ءتىلشىسى.

حانس كليۋگە كوروناۆيرۋس پاندەمياسى ءالى دە جالعاسىپ جاتقانىن ايتىپ، حالىقتى كارانتين تالاپتارىن ساقتاۋعا شاقىردى.

«پاندەميا ءالى اياقتالعان جوق. ەۋروپا ايماعىنداعى 53 ەلدىڭ 18-دە ينفەكسيا ءورشىپ تۇر. دەسەكتە، جاقسى ۇدەرىس بار، قوعامدا ۇجىمدىق يممۋنيتەت قالىپتاسا باستادى، ۆاكسيناتسيا دەڭگەيى جوعارى ەلدەردە ەكونوميكا بىرتىندەپ قالپىنا كەلىپ، ءولىم- ءجىتىم ازايدى»، - دەدى سپيكەر الماتىداعى جۇمىس ساپارى بارىسىندا.

ونىڭ ايتۋىنشا، ۆاكسيناتسيا دەڭگەيى وتە تومەن ەلدەردە ينفەكسيا قايتا ءورشىپ بارادى.

«مەن بولاشاققا سەنىممەن قارايمىن. كوروناۆيرۋس ءبىزدى بىرنەشە رەت تاڭ قالدىردى. ەرتەڭگى كۇنى ونىڭ جاڭا نۇسقاسى پايدا بولۋى دا مۇمكىن. الايدا، حالىق ونى ەشقانداي لوكداۋنسىز جەڭە الادى. تەك ءتورت شارتتى ورىنداسا بولعانى:

بىرىنشىدەن، حالىقتىڭ الەۋمەتتىك جاعىنان ءالسىز توبىن قورعاۋ كەرەك. ويتكەنى، COVID-19-دان قايتىس بولعان ادامداردىڭ باسىم بولىگى ەكپە الماعان ەگدە جاستاعى نەمەسە سوزىلمالى اۋرۋعا شالدىققان ادامدار. ياعني، ۆاكسيناتسيا الماعاندار كوروناۆيرۋسقا قارسى ەكپەنى الۋ قاجەت. ال ەكپە العاندار ونىڭ ءۇشىنشى، كۇشەيتكىش دوزاسىن الۋى ءتيىس.

ەكىنشىدەن، ءاربىر ەل ۆيرۋستىڭ جاڭا نۇسقاسى پايدا بولعان كەزدە باسقا مەملەكەتتەرگە حابارلاۋ ءۇشىن مونيتورينگتى كۇشەيتۋى كەرەك. ونى مەديتسينالىق- سانيتارلىق العاشقى كومەك ۇيىمدارى ارقىلى جاساۋعا بولادى.

ۇشىنشىدەن، كوروناۆيرۋسقا قارسى پرەپاراتتاردىڭ قولجەتىمدى بولۋى وتە ماڭىزدى. ۆيرۋستى جەڭۋدىڭ جاقسى جولى - ۆاكسيناتسيا جانە ەمدەۋ. تورتىنشىدەن، مەملەكەتتەر قابىلدانعان شارالاردى بىرتە- بىرتە جەڭىلدەتۋى كەرەك. الايدا ادامدار كوپ جينالاتىن جەرلەردە ءالى دە ماسكا تاعۋدى ۇسىنامىن»، - دەدى ول.

اۆتور: الما مۇقانوۆا