باس ءمۇفتي ورازانى وزبەكستان، قىرعىزستان ەلدەرىمەن كەڭەسىپ بەلگىلەۋدىڭ سەبەبىن ءتۇسىندىردى
«كەيدە بۇقارالىق اقپارات قۇرالدارى وكىلدەرى تاراپىنان «رامازان ايىنىڭ باستالاتىن كۇنىن وزبەكستان جانە قىرعىزستان مۇسىلماندارى ءدىني باسقارماسىمەن كەڭەسۋ ارقىلى بەلگىلەۋ قانداي قاجەتتىلىكتەن تۋدى؟» دەگەن ساۋالدار قويىلىپ قالادى. وسى رەتتە ايتا كەتەتىن جايت، وزدەرىڭىزگە بەلگىلى، وسىعان دەيىن ورتالىق ازيا ەلدەرى اراسىندا ءدىني مەرەكەلەردى اتاپ وتۋدە ايىرماشىلىق بولاتىن. ونىڭ وزىندىك دالەلگە سۇيەنگەن عىلىمي ءارى ءدىني سەبەپتەرى بولدى. الايدا اۋىلى ارالاس جاتقان باۋىرلاس ەلدەر ورازانى ەكى كۇندە باستاپ، ايت مەرەكەسىن ەكى كۇندە اتاپ وتكەن جاعداي بىرنەشە رەت قايتالاندى»، - دەدى ناۋرىزباي قاجى تاعان ۇلى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
باس ءمۇفتيدىڭ ايتۋىنشا، جوعارىدا اتالعان جاعداي جاماعاتتىڭ تۇسىنبەۋشىلىگىن تۋدىردى.
«ءبىز وزبەكستان، قىرعىزستان ەلىنە بارعان جۇمىس ساپارىمىزدا وسى ماسەلەنى جان- جاقتى تالقىلاپ، ورتاق ءپاتۋا قابىلداۋعا ۋاعدالاستىق. كەلەسىم نەگىزىندە ەكىجاقتى مەموراندۋم قابىلداندى. اللاعا شۇكىر، بۇگىندە ورتالىق ازيا ەلدەرىنىڭ شاريعات جانە ءپاتۋا سالاسى بويىنشا ارنايى كەڭەسى قۇرىلىپ، ورتاق ماسەلەلەردى ءوزارا كەلىسىپ، كەڭەسىپ، شەشىم قابىلداپ كەلەمىز»، - دەيدى ول.
ايتا كەتەيىك، بيىل رامازان ايى 2- ساۋىردە باستالىپ، 1- مامىردا اياقتالادى.
اۆتور: ءالي يبرايەۆ
