زەلەنسكي رەسەي-ۋكراين كەلىسسوزى تۋرالى ءوز ويىن ايتتى

كيەۆ. قازاقپارات - ۋكراينانىڭ رەسەي فەدەراتسياسىمەن كەلىسسوزدەردەگى باسىمدىقتارى وزگەرىسسىز قالادى - ەگەمەندىك، اۋماقتىق تۇتاستىق جانە قاۋىپسىزدىك ماسەلەلەرى.

بۇل تۋرالى دۇيسەنبىدە ۋكراينا پرەزيدەنتى ۆلاديمير زەلەنسكي مالىمدەدى، دەپ حابارلايدى قازاقپارات ۋكراين باسشىسىنىڭ تەلەگرام كانالىنا سىلتەمە جاساپ.

«الدا كەلىسسوزدەردىڭ جاڭا راۋندى، ءبىز بەيبىتشىلىكتى قالايمىز. ماعان ءمالىم بولعانداي، تۇركيا اۋماعىندا بەتپە-بەت كەزدەسۋ مۇمكىندىگى پايدا بولدى. بۇل جامان ەمەس. ناتيجەسىن كورەيىك. ءبىزدىڭ باسىمدىقتارىمىز بەلگىلى. ۋكراينانىڭ ەگەمەندىگى مەن اۋماقتىق تۇتاستىعى كۇمانسىز. مەملەكەتىمىز ءۇشىن ءتيىمدى قاۋىپسىزدىك كەپىلدىكتەرى مىندەتتى. ءبىزدىڭ ماقساتىمىز دا ايقىن - بەيبىتشىلىك پەن قالىپتى ءومىردى تەز ارادا قالپىنا كەلتىرۋ»، - دەدى زەلەنسكي ۆيدەو ۇندەۋىندە.

ەسكە سالساق، رەسەي دەلەگاتسياسىنىڭ باسشىسى، پرەزيدەنت كومەكشىسى ۆلاديمير مەدينسكي رەسەي مەن ۋكراينا دەلەگاتسيالارى كەلىسسوزدەردىڭ كەزەكتى راۋندىن 29-30-ناۋرىزدا وتكىزۋ تۋرالى شەشىم قابىلداعانىن حابارلاعان بولاتىن. بۇعان دەيىن دە ەكى ەل اراسىندا بىرنەشە كەلىسسوز وتكىزىلدى، ءبىراق ايتارلىقتاي ناتيجە بولعان جوق.