توسەكتە ۇزاق جاتۋدىڭ زيانى قانداي؟

نۇر-سۇلتان. قازاقپارات - كەيدە ادامنىڭ ۇيقىدان ويانىپ، نە ۇيىقتاي الماي ۇزاق جاتىپ قالۋى مۇمكىن.

كەيبىرىمىز ءتىپتى كۇنى بويى توسەكتە جاتۋدى ادەتكە اينالدىرعانبىز. توسەكتە جاتىپ اس ءىشىپ، فيلم كورۋدى، كىتاپ وقۋدى ءجون كورەمىز دەگەندەي. الايدا توسەكتە ۇزىننان ۇزاق سۇلاپ جاتۋدىڭ زيان ەكەنىن بىلەسىز بە؟

70 كۇندىك زەرتتەۋ

2014-جىلى NASA ۇيىمى عارىشتا ۇزاق بولعان ادامنىڭ سۇيەگى مەن بۇلشىقەتى قالاي زيان شەگەتىنىن ءبىلۋ ءۇشىن زەرتتەۋ جۇرگىزگەن ەكەن. وعان دريۋ يۆانيتسكي ەسىمدى ەرىكتى ازامات قاتىسقان. تاجىريبەنىڭ شارتى بويىنشا، قاتىسۋعا ەرىك بىلدىرگەن ازامات 70 كۇن بويى توسەكتەن تۇرماي جاتۋى ءتيىس ەدى. تەك تاماق ءىشۋ ءۇشىن شىنتاقتاپ تۇرعانى بولماسا، باسقا قيمىل كورسەتپەگەن.

تاجىريبەگە قاتىسقانى ءۇشىن ازاماتقا 18 مىڭ دوللار جالاقى تولەگەن. الايدا بۇل جاي جاتۋدىڭ ءوزى دەنساۋلىققا سونشا زيان تيگىزەتىنىن ازاماتتىڭ ءوزى بىلمەسە كەرەك. بىلايشا ايتقاندا، جاتىپ-اق اقشا تابامىن دەپ ويلاعان سىڭايلى. توسەكتەن تۇرعان ساتتە 15 مينۋت بويى ەسىن جيناي الماعان. ونە بويى تەرلەپ، دەنەسى دۋىلداپ قىشىپ، جۇرەك سوعىسى مينۋتىنا 150 كە ءبىر-اق جەتكەن.

بۇدان ۇزاق ۋاقىت توسەكتە بۇيعىپ جاتۋدىڭ زيان ەكەنىن ايتپاساقتا تۇسىنىكتى. الايدا از جاتۋدىڭ ءوزى قانشالىقتى زيان، ەندى سوعان توقتالايىق.

ال جاتۋ دا زيان با؟

توسەكتە ۇزاق جاتۋ، كۇنى بويى جاتۋ ادامنىڭ فيزيكالىق تا، ەموتسيونالدى دا حال-جاعدايىنا كەرى اسەر ەتەدى ەكەن.

بىرىنشىدەن، ۇزاق جاتۋ دەنەنى ۇيىتىپ تاستايدى. سودان قان اينالىمى بۇزىلادى. ادام تۇندە ۇيىقتاعاندا، ارى-بەرى قوزعالىپ، جاتىسىن اۋىستىرىپ ۇيىقتايدى. بۇل ادامنىڭ تابيعي رەاكسياسى. ويتكەنى قان اينالىمى دۇرىس ءجۇرۋى ءتيىس. ال قوزعالىسسىز جاتا بەرگەن ادامنىڭ قان اينالىمى بۇزىلادى دا، قان بارماعان تەرى بولىگى اقىرىنداپ «ولە باستايدى». جان سەزبەي قالادى.

ەكىنشىدەن، ۇزاق جاتۋ بەل اۋرۋىنا اكەلەدى. 2004-جىلعى زەرتتەۋدە بەلى اۋىرىپ دارىگەرگە قارالعان جاندارعا توسەكتە جاتۋعا كەڭەس بەرىلگەن ەكەن. الايدا سول ناۋقاستاردىڭ كەيىن 32 پايىزى قايتادان دارىگەرگە جۇگىنىپ، بەل اۋرۋى سوزىلمالى ستادياعا ءوتىپ كەتكەنىن ايتقان.

سوندىقتان دارىگەرلەر بەلى اۋىرعان ادامنىڭ توسەكتە جاتقانى دۇرىس، ءبىراق ۇزاق جاتۋىنا بولمايدى دەگەن ويعا كەلگەن.

ۇشىنشىدەن، ۇزاق جاتقان ادامنىڭ بالدىر مەن جامباس جاعىنداعى ۆەنا تامىرلارى ءۇزىلىپ، ترومبىلار ءتۇزىلۋى مۇمكىن. ونداي ترومبىلار قانعا ءوتىپ، وكپەگە ءتۇسىپ كەتۋى مۇمكىن.

تورتىنشىدەن، ۇزاق جاتقان ادام پسيحولوگيالىق كۇيزەلىسكە بەيىم كەلەدى. بۇل ءوز كەزەگىندە دەپرەسسيا مەن نيەۆروزدىڭ پايدا بولۋىنا اكەلەدى.

massaget.kz