شەكارا ارقىلى ەسىرتكى وتكىزۋمەن اينالىسقان شەتەلدىكتەر سوتتالدى – ق ر ۇ ق ك

نۇر-سۇلتان. قازاقپارات – ق ر مەملەكەتتىك شەكاراسىن زاڭسىز كەسىپ وتكەن جانە ەسىرتكى كونترابانداسىمەن اينالىسقان شەتەلدىكتەر سوتتالدى، دەپ حابارلايدى قازاقپارات ق ر ۇ ق ك باسپا ءسوز قىزمەتىنە سىلتەمە جاساپ.

2021 -جىلعى قازاندا شەكارا قىزمەتى مەن ۇ ق ك ماڭعىستاۋ وبلىسى بويىنشا دەپارتامەنتى كاسپي تەڭىزى سۋ ايلاعىنداعى بىرلەسكەن ءىس-شارالار بارىسىندا قازاقستان رەسپۋبليكاسىنىڭ مەملەكەتتىك شەكاراسىن قاساقانا زاڭسىز كەسىپ وتكەنى ءۇشىن ەكى شەتەل ازاماتى بار «امۋر» ءتيپتى شاعىن كەمەنى ۇستاعان.

ءجۇزۋ قۇرالىن تەكسەرۋ بارىسىندا سالماعى 14 ك گ «اپيىن»، 8 ك گ «گاشيش» جانە «مەتادون» پسيحوتروپتىق زاتىنىڭ 29 پلاستيناسى تابىلىپ، تاركىلەندى.

2021 -جىلعى جەلتوقساندا ۇستالعانداردىڭ ءبىرى 392-باپتىڭ 1-بولىگى (قازاقستان رەسپۋبليكاسىنىڭ مەملەكەتتىك شەكاراسىن قاساقانا زاڭسىز كەسىپ ءوتۋ) بويىنشا كىنالى دەپ تانىلىپ، 5 جىل مەرزىمگە ق ر شەگىنەن شىعارۋمەن 6 ايعا باس بوستاندىعىنان ايىرىلدى. 2022 -جىلعى 10-ناۋرىزدا مامانداندىرىلعان اۋدانارالىق سوت ەكىنشى شەتەلدىك ازاماتتى قىلمىستىق كودەكستىڭ 286-بابى 4-بولىگى (اينالىستان الىپ قويىلعان زاتتاردىڭ نەمەسە اينالىسى شەكتەلگەن زاتتاردىڭ كونترابانداسى)، 297-بابى 3-بولىگى 1، 3-تارماقتارى (ەسىرتكى قۇرالدارىن، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ) جانە 392-بابى 1-بولىگى (قازاقستان رەسپۋبليكاسىنىڭ مەملەكەتتىك شەكاراسىن قاساقانا زاڭسىز كەسىپ ءوتۋ) بويىنشا كىنالى دەپ تانىدى. ول جازاسىن قىلمىستىق- اتقارۋ جۇيەسىنىڭ قاۋىپسىزدىگى بارىنشا جوعارى مەكەمەسىندە وتەۋمەن 17 جىلعا باس بوستاندىعىنان ايىرىلدى.