قازاقستاندا جابىق مەكەمەدە ماسكا تاعىپ ءجۇرۋ تالابى الىندى

نۇر-سۇلتان. قازاقپارات - بۇگىن پرەمەر-ءمينيستردىڭ ورىنباسارى ەرالى توعجانوۆتىڭ توراعالىعىمەن قازاقستان اۋماعىندا كوروناۆيرۋس ينفەكتسياسىنىڭ تارالۋىنىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسى ءوتتى.

قازاقپارات بۇل تۋرالى primeminister.kz سايتىنا سىلتەمە جاساپ حابارلايدى.

كوميسسيا جۇمىسىنا مەملەكەتتىك ورگانداردىڭ، «اتامەكەن» ۇ ك پ وكىلدەرى جانە وڭىرلەردىڭ باسشىلارى قاتىستى.

ەلدەگى ەپيدەميولوگيالىق جاعدايدىڭ تۇراقتانۋىن ەسكەرە وتىرىپ، ۆەدومستۆوارالىق كوميسسيا كەلەسىدەي شەشىمدەر قابىلدادى:

- ءۇي-جايلاردا مىندەتتى ماسكا تاعۋ تالابىن الىپ تاستاۋ؛

- مەديتسينالىق مەكەمەلەردە (پەرسونال، قىزمەتكەرلەر، پاتسيەنتتەر، كەلۋشىلەر) مەديتسينالىق ماسكالاردى تاعۋ مىندەتىن ءوز كۇشىندە قالدىرۋ؛

- ادام كوپ جينالاتىن ورىنداردا، قوعامدىق كولىكتە، ۇيىمداسقان ۇجىمداردا ماسكا تاعۋدى ۇسىنىمدىق سيپاتتا قالدىرۋ؛

- ءبىلىم بەرۋ ۇيىمدارىندا وقىتۋدىڭ كابينەتتىك جۇيەسىنە رۇقسات بەرۋ. سونداي-اق كوميسسيا شەشىمىمەن «Pfizer» پرەپاراتىمەن ۆاكسينالاۋعا جاتاتىن تۇلعالار كونتينگەنتى كەڭەيتىلەدى، ول مىناداي ساناتتارمەن تولىقتىرىلادى:

- باستاپقى ۆاكتسينالاۋدان وتەتىن، پروفيلاكتيكالىق ۆاكسينا العىسى كەلەتىن ادامدار؛

- ءتۇرلى سەبەپتەرمەن شەتەلگە شىعۋ ءۇشىن قايتالاما ەكپە الۋشىلار؛

- شەتەلدە العان ۆاكسينا كۋرسىن اياقتاۋ ءۇشىن ەكپە الۋشى تۇلعالار؛

- COVID-19 ۆيرۋسىنا قارسى ريەۆاكسيناتسيا الۋشى بارلىق توپتاعى ادامدار.

وتىرىس سوڭىندا ە. توعجانوۆ قولايلى ەپيدەميولوگيالىق جاعدايدى قامتاماسىز ەتۋدىڭ باستى شارتتارىنىڭ ءبىرى ازاماتتاردى ۋاقىتىلى يممۋنداۋ جانە ريەۆاكسينالاۋ ەكەنىن اتاپ ءوتتى.

ول اكىمدىكتەرگە كوروناۆيرۋس ينفەكتسياسىنا قارسى ەگۋ ناۋقانىن ەرەكشە باقىلاۋعا الۋدى تاپسىردى جانە حالىق اراسىندا ساپالى ءتۇسىندىرۋ جۇمىستارىن جۇرگىزۋ قاجەتتىگىن اتاپ ءوتتى.