قازاقستان ءدارى- دارمەكتى ەلدەن شىعارۋعا تىيىم سالماق

بۇيرىقتىڭ جوباسى بويىنشا، قازاقستان اۋماعىنان كەز كەلگەن نىسانداعى دارىلىك زاتتاردى، ونىڭ ىشىندە فارماتسيەۆتيكالىق سۋبستانسيالاردى، مەديتسينالىق بۇيىمداردى، سونداي- اق ولاردى وندىرۋگە ارنالعان ماتەريالدار مەن جيناقتاۋىشتاردى اكەتۋگە 6 اي كولەمىندە تىيىم سالۋ ۇسىنىلعان. دەگەنمەن، ءدارى- دارمەكتىڭ بىرنەشە ساناتىنا بۇل قۇجاتتىڭ تالابى جۇرمەيتىنى ايتىلعان.

ولار:

- قازاقستاننىڭ اۋماعى ارقىلى وتەتىن ترانزيتتىك تاۋارلار؛

- جەكە تاپسىرىستار بويىنشا تەك جەكە پايدالانۋعا ارنالعان مەديتسينالىق بۇيىمدار؛

- حالىقارالىق ىزگىلىك كومەك كورسەتۋگە ارنالعان تاۋارلار؛

- بولشەك ساۋدادا وتكىزۋ شەڭبەرىندە جەكە پايدالانۋ ءۇشىن اكەلىنگەن جانە ساتىپ الىنعان تاۋارلار؛

- تەگىن مەديتسينالىق كومەكتىڭ كەپىلدىك بەرىلگەن كولەمى جانە م ءا م س شەڭبەرىندە الىنعان دارىلەر؛

- وتكىزۋ قۇقىعىنسىز كورمەلەر وتكىزۋگە ارنالعان ۇلگىلەر؛

- زەرتتەۋلەر مەن سىناقتار جۇرگىزۋگە ارنالعان ۇلگىلەر؛

- دەنساۋلىق ساقتاۋ ۇيىمدارىندا دايىندالىپ، قولدانىلعان راديوفارماتسيەۆتيكالىق پرەپاراتتار؛

- مەملەكەتتىك تىركەۋ كەزىندە ساراپتاما جۇرگىزۋگە ارنالعان ۇلگىلەر؛

- پاتسيەنتتىڭ نەمەسە ونىڭ دونوردىڭ اۋتولوگيالىق بيوماتەريالدارىن پايدالانا وتىرىپ قابىلداناتىن، جەكە قولدانۋعا ارنالعان الدىڭعى قاتارلى تەراپيا دارىلەرى؛

- ەاەو كەدەندىك اۋماعىنا كەلگەن كولىك قۇرالدارىنىڭ جولاۋشىلارى مەن ەكيپاج مۇشەلەرىن ەمدەۋگە ارنالعان ءدارى- دارمەكتەر؛

- حالىقارالىق مادەني، سپورتتىق ءىس- شارالارعا قاتىسۋشىلاردى جانە حالىقارالىق ەكسپەديتسيالارعا قاتىسۋشىلاردى ەمدەۋگە ارنالعان ءدارى- دارمەكتەر؛

- قازاقستان تاۋار وندىرۋشىلەرى وندىرگەن، ولارعا قاتىستى تىيىم سالىنعان «ست-1» نىسانىنداعى تاۋاردىڭ شىعۋ تەگى تۋرالى سەرتيفيكاتپەن سۇيەمەلدەنەتىن ءدارى- دارمەكتەر.

قۇجات كوپشىلىكتىڭ تالقىلاۋىنا 6- ساۋىرگە دەيىن ۇسىنىلماق. جوبانىڭ ماتىنىمەن مىنا جەردەن تانىسۋعا بولادى.

اۆتور: ەسىمجان ناقتىباي