قوعامدىق كەڭەس قىزمەتى تۋرالى ۇلتتىق بايانداما دايىندالادى

«ءبىزدى اۋقىمدى ءىس كۇتىپ تۇر. پرەزيدەنت، پارلامەنت، ساياسي پارتيالار، سوت جانە قۇقىق قورعاۋ ورگاندارىنىڭ نەگىزگى قۇزىرەتى قايتا قارالادى. ءبىزدى سۋپەرپرەزيدەنتتىك باسقارۋ فورماسىنان پارلامەنتى مىقتى پرەزيدەنتتىك رەسپۋبليكاعا ءوتۋ كۇتىپ تۇر. ءبىزدىڭ مينيسترلىككە كەلسەك، قوعامدىق كەڭەستىڭ قۇرامىن جاڭارتىپ، مينيسترلىكتىڭ قىزمەتىن جەتىلدىرە ءتۇسۋ جۇمىسى جالعاسىن تابادى. قازىرگى تاڭدا ەلىمىزدە 102 كەڭەس قۇرىلدى. ودان بولەك، تاعى 111 كەڭەس قۇرۋ قارالىپ جاتىر. جاڭا كەڭەستەردى قۇرۋدا ۇكىمەتتىك ەمەس ۇيىم، پارتيا جانە ازاماتتىق ينستيتۋتتاردىڭ وكىلدەرى كەڭىنەن تارتىلۋدا. بيىل العاش رەت قازاقستاندا قوعامدىق كەڭەس قىزمەتى تۋرالى ۇلتتىق بايانداما ازىرلەنەدى»، - دەدى دانيار قادىروۆ.

ۆيتسە- ءمينيستردىڭ ايتۋىنشا، قوعامدىق كەڭەستەردىڭ جۇمىسىنا تالداۋ جاسالىپ، ونىڭ بولاشاق دامۋى زەردەلەنبەك.

«سونىمەن قاتار ۇكىمەتتىك ەمەس ۇيىمداردىڭ جوبالارىن جوسپارلاۋدى مەملەكەتتىك تاپسىرىس جۇيەسى ارقىلى جۇزەگە اسىرۋ قارالادى. كەلەلى ماسەلەلەردى شەشۋدە قۇزىرلى ورگاندارمەن بىرگە قوعام بەلسەندىلەرى تارتىلادى. ءار شەشىم بويىنشا تياناقتى تالداۋ جاسالادى. ودان بولەك، پارلامەنت قابىرعاسىندا قوعامدىق باقىلاۋ تۋرالى زاڭناما تالقىلانىپ جاتىر. ول زاڭ مەملەكەت پەن ازاماتتار اراسىندا جاڭا ءپرينتسيپتى قالىپتاستىرۋعا مۇمكىندىك بەرەدى»، - دەيدى ول.

ايتا كەتسەك، وسى ۋاقىتا قازاقستاندىق قوعامدىق دامۋ ينستيتۋتى جانىنداعى «Sarap» ساپارتىق كلۋبى الاڭىندا «جاڭا قازاقستان» ءۇشىن ساياسي رەفورمالاردىڭ جاڭا باعدارلاماسى» اتتى دوڭگەلەك ۇستەل وتىرىسى ءوتىپ جاتىر. اتالعان شاراعا پارلامەنت ءماجىلىسىنىڭ دەپۋتاتتارى، ساياساتتانۋشىلار، قوعام قايراتكەرلەرى مەن ساراپشىلار قاتىسۋدا.

اۆتور: ءالي يبرايەۆ